ئىستانبۇلنىڭ ھەرقايسى جايلىرىدىن كەلگەن ئون مىڭلىغان كىشى پەلەستىنگە ھەمدەم ئىكەنلىكىنى بىلدۈرۈش ۋە پەلەستىنلىكلەرگە قارىتىلغان ئۇرۇشنىڭ توختىتىلىشىنى تەلەپ قىلىش ئۈچۈن توپلاندى.
«سۈكۈت قىلمايمىز، پەلەستىننى ئۇنتۇمايمىز» ناملىق بۇ يىغىلىش، ئىنسانىي ياردەم ئىتتىپاقى ۋە مىللىي ئىرادە سۇپىسى تەرىپىدىن ئۇيۇشتۇرۇلغان بولۇپ، 400 دىن ئارتۇق ئاممىۋىي تەشكىلاتنى بىر يەرگە جەم قىلدى.
قاتناشقۇچىلار پەيشەنبە كۈنى ئايا سوفىيە جامىسى، سۇلتان ئەھمەد جامىسى، فاتىھ جامىسى، سۇلايمانىيە جامىسى ۋە ئەمىنۆنۈ يېڭى جامىسى قاتارلىق چوڭ جامىلەردە بامدات نامىزىنى ئوقۇش بىلەن كۈننى باشلىدى. ئۇ يەردىن گۇرۇپپىلارغا بۆلۈنۈپ گالاتا كۆۋرۈكىگە قاراپ يۈرۈش قىلدى، تۈركىيە ۋە پەلەستىن بايراقلىرىنى لەپىلدەتتى، «ئىستانبۇلدىن غەززەگە، قارشىلىق كۆرسىتىش ھەرىكىتىگە مىڭلارچە سالام» ۋە «پەلەستىنگە ئازادلىق» دېگەن شوئارلارنى توۋلىدى.
بۇ يەردە كۆپچىلىككە خىتاب قىلغان ئىلىم يايما ۋەقفىنىڭ رەئىسى بىلال ئەردوغان، پۇقرالار ئوتتۇرىسىدىكى ھەمكارلىقنىڭ كۈچىيىۋاتقانلىقىنى تەكىتلەپ: «ھەر يىلى قاتنىشىش كۆلىمى كېڭەيمەكتە، بۈگۈن بىر مىللەت سۈپىتىدە ئورتاق قىممەت قارىشىمىزنىڭ كۈچىنى ھېس قىلىۋاتىمىز» دېگەن سۆزلەر بىلەن پەلەستىنلىكلەر ۋە قۇددۇسنىڭ ئەركىنلىكى ئۈچۈن دۇئا قىلدى.
يۈرۈشكە تۈركىيەنىڭ ھاكىمىيەت بېشىدىكى ئادالەت ۋە تەرەققىيات پارتىيەسىنىڭ ئىستانبۇل شۆبە رەئىسى ئابدۇللاھ ئۆزدەمىر ۋە ئىمام خاتىپلار جەمئىيىتىنىڭ رەئىسى ئابدۇللاھ جەيلان قاتارلىق دىنىي ۋە خەلق رەھبەرلىرى قاتناشتى.
قاتناشقۇچىلار «پەلەستىن ئۈچۈن ئادالەت، دۇنيا ئۈچۈن ۋىجدان» دەپ يېزىلغان پىلاكاتلارنى كۆتۈرۈشتى ۋە پات-پات ئىسرائىلىيەنىڭ قاتتىق قول سىياسەتلىرىنى ئەيىبلەيدىغان شوئارلارنى توۋلىدى. پىدائىيلار يۈرۈش يولى بويىدا چاي، شورپا ۋە سىمىت تارقاتتى.
ساقچىلار يۈرۈش يولىدا قاتتىق بىخەتەرلىك تەدبىرلىرىنى ئالدى، ئۇيۇشتۇرغۇچىلار بۇ يىغىلىشنى پەلەستىنلىكلەرنى قوللايدىغان تىنچ نامايىش دەپ سۈپەتلىدى.
نۇرغۇن قاتناشقۇچىلار 2026-يىلىنىڭ ئادالەت، تىنچلىق ۋە غەززەدىكى ئازابلارنىڭ ئاخىرلىشىشىنى ئېلىپ كېلىدىغانلىقىغا بولغان ئۈمىدىنى ئىپادىلىدى ھەمدە بۇ نامايىشنىڭ ئىستانبۇلدىن دۇنياغا يوللانغان «كۈچلۈك ھەمكارلىق ئۇچۇرى» ئىكەنلىكىنى بىلدۈردى.
