تۈركىيە تاشقى ئىشلار مىنىستىرى خاقان فىدان تۈركىيەنىڭ پەلەستىندە ئىككى دۆلەتلىك ھەل قىلىش چارىسى ئۈچۈن كاپالەتچى بولۇشقا تەييار ئىكەنلىكىنى بىلدۈردى ھەمدە شەرم ئەلشەيختە ھاسىل قىلىنغان كېلىشىمنىڭ «ھەم غەززە ھەم رايون ئۈچۈن تارىخىي» ئەھمىيەتكە ئىگە ئىكەنلىكىنى تەكىتلىدى.
فىدان شەنبە كۈنى تۈركىيەنىڭ «ÜLKE TV» قانىلىنىڭ زىيارىتىنى قوبۇل قىلغاندا، ئىككى دۆلەتلىك ھەل قىلىش چارىسى رامكىسى يولغا قويۇلمىغان ئەھۋالدا، «بىر مەزگىلدىن كېيىن يېڭى بىر ئۇرۇشنى كۆرۈشىمىز مۇمكىن» دەپ ئاگاھلاندۇردى ھەمدە ھازىرقى ئۇرۇش توختىتىشنى قوغدىيالماسلىقنىڭ «بىر ئۇرۇشنى ئەمەس، بەلكى يەنە بىر ئىرقىي قىرغىنچىلىقنى كەلتۈرۈپ چىقىرىدىغانلىقىنى» قوشۇمچە قىلدى.
تۈركىيەنىڭ مۇھىم نۇقتىلىرىنى چۈشەندۈرگەن فىدان، دىققەت مەركىزىنىڭ «كېلىشىم شەرتلىرىگە ئەمەل قىلىنىشىغا كاپالەتلىك قىلىش، ئىنسانپەرۋەرلىك ياردەملىرىنىڭ يەتكۈزۈلۈشىنى كاپالەتلەندۈرۈش، پەلەستىنلىكلەرنىڭ غەززەنى باشقۇرۇشنى ئۆتكۈزۈۋېلىشىنى ئەمەلگە ئاشۇرۇش ۋە ئىككى دۆلەتلىك ھەل قىلىش چارىسىگە قاراپ قەتئىي قەدەم بېسىش» ئىكەنلىكىنى ئىپادىلىدى.
ئەنقەرەنىڭ مەقسىتىنىڭ تېخىمۇ كۆپ جىددىيچىلىكنىڭ ئالدىنى ئېلىش ۋە رايوندا مەڭگۈلۈك تىنچلىقنىڭ ئاساسىنى تىكلەش ئىكەنلىكىنى تەكىتلىدى.
پەلەستىن دۆلىتىگە قاراپ يول
تۈركىيە جۇمھۇر رەئىسى رەجەپ تاييىپ ئەردوغان ئىلگىرىكى باياناتىدا، غەربنىڭ پەلەستىننى ئېتىراپ قىلىش قەدەملىرىنى پەقەت دىپلوماتىك ئىشارەتلەرلا ئەمەس، بەلكى ئىككى دۆلەتلىك ھەل قىلىش چارىسىنىڭ ئۇل تېشى دەپ تەسۋىرلىگەن ئىدى.
ئەردوغان بۇ ھەقتە سۆز قىلىپ مۇنداق دېگەن ئىدى: «بۇ باسقۇچتا، ئىككى دۆلەتلىك ھەل قىلىش چارىسىگە يۈزلەنگەن تىرىشچانلىقلارنى كۈچەيتىش زۆرۈر. بىز غەرب دۆلەتلىرىنىڭ، بولۇپمۇ ئەنگلىيە ۋە فرانسىيەنىڭ پەلەستىن دۆلىتىنى ئېتىراپ قىلىش قارارىنى پەقەت ئېتىراپ قىلىش ھەرىكىتى سۈپىتىدە ئەمەس، بەلكى ئىككى دۆلەتلىك ھەل قىلىش چارىسىگە بارىدىغان مۇساپىدىكى ئاساسلىق قەدەملەر دەپ قاراشنى خالايمىز. ئەگەر ئۇنداق بولمىسا، بېسىلغان قەدەملەر تولۇق بولمايدۇ ۋە كۆزلەنگەن نىشانغا يەتكىلى بولمايدۇ».
ئەردوغان سۆزىدە، 1967-يىلىدىكى چېگراغا ئاساسلانغان، شەرقىي قۇددۇسنى پايتەخت قىلغان مۇستەقىل، ئىگىلىك ھوقۇقلۇق ۋە جۇغراپىيىلىك پۈتۈنلۈككە ئىگە بىر پەلەستىن دۆلىتىنىڭ بىردىنبىر ھەل قىلىش چارىسى ئىكەنلىكىنى يەنە بىر قېتىم تەكىتلەش ئارقىلىق، تۈركىيەنىڭ مەيدانىنىڭ ئاساسىي لىنىيەسىنى سىزىپ چىققان ئىدى.
