سودا ئۇرۇشى گۈللىنىۋاتقان بازارلارغا كوۋىد ۋاباسىدىنمۇ ئېغىر تەسىر كۆرسەتتى.
ترامپنىڭ بىر يىغىلىش جەريانىدا پولات ۋە ئاليۇمىن باجلىرىنى % 50 گە ئۆستۈرىدىغانلىقىنى ئېيتىشى، يەر شارى خاراكتېرلىك سودا ئۇرۇشىدا يېڭى داۋالغۇش پەيدا قىلدى.
خەلقئارا پۇل فوندى تەشكىلاتى (IMF) نىڭ مۇئاۋىن رەئىسى گىتا گوپىنات، سودا ئۇرۇشىنىڭ كەلتۈرۈپ چىقارغان زەربىسىنىڭ تەرەققىي قىلىۋاتقان بازارلاردىكى مەركىزىي بانكىلار ئۈچۈن ئوخشىمىغان تەسىرلەرنى كۆرسەتكەنلىكىنى، بۇ ئەھۋالنىڭ «كوۋىد – 19» يۇقۇمى جەرياندىكى پۇل سىياسىتىنى تېز سۈرئەتتە ئاسانلاشتۇرىدىغان مەزگىلگە سېلىشتۇرغاندا تېخىمۇ مۇرەككەپ بىر مەنزىرە شەكىللەندۈرگەنلىكىنى ئېيتتى.
گوپىنات «‹Financial Times› گېزىتى» بىلەن ئۆتكۈزگەن سۆھبىتىدە، تاموژنا باجلىرىنىڭ تەرەققىي قىلىۋاتقان دۆلەتلەر ۋە خەلقئارا پۇل – مۇئامىلە بازارلىرىغا بولغان مۆلچەرلىگۈسىز سەلبىي تەسىرلىرىنىڭ مەركىزىي بانكىلارنىڭ ئىشلىرىنى تېخىمۇ قىيىنلاشتۇرۇۋەتكەنلىكىنى تەكىتلەپ مۇنداق دېدى:
«بۇ قېتىم ‹كوۋىد – 19› يۇقۇمى مەزگىلدىكىگە سېلىشتۇرغاندا، قىيىنچىلىق تېخىمۇ چوڭ بولىدۇ.»
گوپىنات ترامپنىڭ سودا سىياسەتلىرىنىڭ مۆلچەرلىگۈسىز بولۇشى سەۋەبىدىن تەرەققىي قىلىۋاتقان بازارلارنىڭ «تۇمان ئىچىدە قېلىۋاتقانلىقى» نى ۋە ئەھۋالنىڭ تېخىمۇ سەزگۈر ھالغا كەلگەنلىكىنى ئىپادىلىدى.
ترامپنىڭ مۆلچەرلىگۈسىز سودا سىياسىتى
ترامپ ئاپرېل ئېيىدا دېگۈدەك بارلىق دۆلەتلەردىن قىلىنىدىغان ئىمپورتلارغا % 10 تاموژنا بېجى قويدى، پولات، ئاليۇمىن ۋە ئاپتوموبىل مەھسۇلاتلىرىغا بولسا % 25 لىك قوشۇمچە باج قويدى.
بۇنىڭدىن باشقا يەنە، ئونلارچە دۆلەتنىڭ مەھسۇلاتلىرىدىن تېخىمۇ يۇقىرى سەۋىيەدە تاموژنا بېجى ئېلىش تۈزۈمىنى يولغا قويغانلىقىنى جاكارلىدى، ئەمما مۇزاكىرەلەرگە مۆھلەت بېرىش ئۈچۈن بۇلارنى ئىيۇل ئېيىغا قەدەر كېچىكتۈردى.
ئالدىنقى ئايدا ئامېرىكا بىلەن خىتاي جەنۋەدىكى سۆھبەتلەردىن كېيىن تاموژنا بېجىنى ۋاقىتلىق تۆۋەنلىتىش توغرىسىدا پۈتۈشتى، ئەمما ترامپ كېيىن بېيجىڭنى ئۇرۇش توختىتىشنى بۇزۇش (كېلىشىمگە خىلاپلىق قىلىش) بىلەن ئەيىبلىدى.
جۈمە كۈنى ترامپ پېنسيلۋانىيە ئىشتاتىنىڭ ۋېست مېففىن شەھىرىدىكى بىر يىغىلىشتا، پولات ۋە ئاليۇمىن باجلىرىنى % 50 گە ئۆستۈرىدىغانلىقىنى ۋە قايتىدىن يەر شارى خاراكتېرلىك سودا ئۇرۇشى قوزغايدىغانلىقىنى ئېيتتى.
ترامپ سودا ئۇرۇشىنىڭ ئامېرىكا ئىقتىسادىنى كۈچەيتىدىغانلىقىغا ئىشىنىدۇ، ئەمما ئىقتىسادىي ھەمكارلىق ۋە تەرەققىيات تەشكىلاتى ئامېرىكانىڭ ئىقتىسادىي تەرەققىيات مۆلچەرىنى% 2.2 تىن% 1.6 كە چۈشۈردى. بۇ، باي دۆلەتلەر ئارىسىدىكى ئەڭ چوڭ تۈزىتىش بولدى.
