شىمالىي قىبرىس تۈرك جۇمھۇرىيىتىنىڭ ئەرجان ئايرودۇرۇمىدا ئۆتكۈزۈلگەن تېخنولوگىيە فېستىۋالى — «تېكنوفېست» پائالىيىتى ساھەسىدىكى ھاۋا نومۇرلىرى، مۇسابىقىلەر، [بەشىنچى ئەۋلاد كۆچمە خەۋەرلىشىش تېخنىكىسى] 5G كۆرگەزمىلىرى ۋە ئەمەلىي مەشغۇلات سېخلىرى تۇنجى كۈنى 62 مىڭ زىيارەتچىنى جەلپ قىلدى.
تۈركىيەنىڭ تېخنولوگىيە، ئاۋىياتسىيە ۋە ئالەم قاتنىشى ساھەلىرىدىكى باشلامچى پائالىيىتى «تېكنوفېست» نىڭ ئەڭ يېڭىسى شىمالىي قىبرىس تۈرك جۇمھۇرىيىتىنىڭ لەفكوشا شەھىرىدە ئۆتكۈزۈلۈۋاتقان بولۇپ، مىڭلارچە كىشىنى كۈتۈۋالماقتا. تۆت كۈن داۋاملىشىدىغان پائالىيەتنىڭ تۇنجى كۈنىگە تەخمىنەن 62 مىڭ زىيارەتچى قاتناشتى.
پەيشەنبە كۈنى باشلانغان بۇ فېستىۋال، شىمالىي قىبرىس تۈرك جۇمھۇرىيىتىنىڭ پايتەختى لەفكوشادىكى ئەرجان ئايرودۇرۇمىدا، شىمالىي قىبرىس تۈرك جۇمھۇرىيىتى جۇمھۇر رەئىسلىك مەھكىمىسىنىڭ ھىمايىسىدە ئۆتكۈزۈلمەكتە.
بۇ پائالىيەت مۇسابىقىلەر، ھاۋا نومۇرلىرى، كۆرگەزمىلەر ۋە ئەمەلىي مەشغۇلات سېخلىرىنى ئۆز ئىچىگە ئالغان مول مەزمۇنلۇق پىروگراممىلارنى سۇنماقتا. جۈمە كۈنى، مۇھىم ھاۋا نومۇرلىرىدىن باشقا، 5G تېخنىكىسىغا مۇناسىۋەتلىك بىر كۆرگەزمىمۇ ئۆتكۈزۈلدى.
تۈركىيە GSM شىركىتى «تۈركسەل» تەرىپىدىن ئېلىپ بېرىلغان 5G سىنىقىدا، يېڭى ئەۋلاد مۇستەقىل بىر دېڭىز قاتناش ۋاسىتىسى 5G ئۇلىنىشى ئارقىلىق يىراقتىن كونترول قىلىندى. بۇ سىناق، «تۈركسەل» نىڭ ئۇچقۇچىسىز دېڭىز قاتناش ۋاسىتىسى ئۈستىدە ئېلىپ بارغان تۇنجى 5G سىنىقى بولۇپ ھېسابلىنىدۇ.
تېخنولوگىيە ۋە روھ ئۆزئارا مۇجەسسەملەشتى
مۇۋەپپەقىيەتلىك سىناقتىن كېيىن سۆز قىلغان «تۈركسەل» نىڭ باش دىرېكتورى ئەلى تاھا كوچ، شىركەتنىڭ يېڭىلىق يارىتىشچان ئۇلىنىش تېخنىكىلىرىدا باشلامچى بولۇشنى داۋاملاشتۇرۇۋاتقانلىقىنى بىلدۈردى.
تۈركىيە تېخنولوگىيە كوماندىسى (T3) ۋەخپى ۋە تۈركىيە سانائەت ۋە تېخنولوگىيە مىنىستىرلىقى تەرىپىدىن ئۇيۇشتۇرۇلغان «تېكنوفېست»، 2018-يىلىدىن بۇيان ھەر يىلى ئونلىغان ھۆكۈمەت ئورگىنى، خۇسۇسىي ساھە شېرىكلىرى ۋە ئۇنىۋېرسىتېتلارنىڭ قوللىشى بىلەن ئۆتكۈزۈلۈپ كەلمەكتە.
ئانادولۇ ئاگېنتلىقى، فېستىۋالنىڭ يەرشارىۋى ئالاقە ھەمراھى بولۇشنى داۋاملاشتۇرماقتا. بۇ پائالىيەت، جۈپ يىللاردا تۈركىيەنىڭ ئوخشىمىغان شەھەرلىرىدە، تاق يىللاردا بولسا ئىستانبۇلدا ئۆتكۈزۈلۈۋاتقان بولۇپ، شىمالىي قىبرىس تۈرك جۇمھۇرىيىتى، 2022-يىلى ئەزەربەيجاندىن كېيىن «تېكنوفېست» نى كۈتۈۋالغان ئىككىنچى خەلقئارالىق جاي بولدى.
«تېكنوفېست»، 2004-يىلى تۈركىيەنىڭ جەنۇبىدىكى ئادانا شەھىرىدە ئۆتكۈزۈلۈپ، تەخمىنەن 1 مىليون 100 مىڭ زىيارەتچىنى كۈتۈۋالغانىدى.
