دائىرىلەر ۋاشىنگتون ئىشتاتىدىكى لوڭۋىيۇ سانائەت زاۋۇتىدىكى بىر «ئاق لىكۆرى» (white liquor) باكىنىڭ ئىچىدىن پارتلىشىدىن كېيىن يوقاپ كەتكەن بارلىق ئىشچىلارنىڭ جەسەتلىرىنىڭ تېپىلغانلىقىنى جەزملەشتۈردى.

دائىرىلەر شەنبە كۈنى ئېلان قىلغان باياناتىدا، ئامېرىكانىڭ ۋاشىنگتون ئىشتاتىدا يۈز بەرگەن خىمىيەلىك باك پارتلاش ۋەقەسى نەتىجىسىدە يوقاپ كەتكەن توققۇز كىشىنىڭ جەسەتلىرىنىڭ ھەممىسىنىڭ تېپىلىشى بىلەن ئۆلگەنلەر سانىنىڭ 11 گە يەتكەنلىكىنى بىلدۈردى.

قەغەز بوتقىسى ئىشلەپچىقىرىشتا ئىشلىتىلىدىغان ناترىي ھىدروكسىد ۋە ناترىي سۇلفىدتىن تەشكىل تاپقان، خىمىيەلىك بىر ئېرىتمە بولغان «ئاق لىكۆرى» قاچىلانغان باكنىڭ سەيشەنبە كۈنى «Nippon Dynawave Packaging» زاۋۇتىدا پارتلىشىدىن كېيىن، ئىككى كىشىنىڭ ئۆلگەنلىكى جەزملەشتۈرۈلگەن ئىدى.

كائۇلىتس 2 ئوت ئۆچۈرۈش ۋە قۇتقۇزۇش ئەترىتىنىڭ ياردەمچىسى كۇرت ستىچ، قۇتقۇزۇش ئەترەتلىرىنىڭ ھەپتە بويى يېپىق بوشلۇقلاردىكى خارابىلىكلەرنى تەكشۈرگەنلىكىنى ۋە زاۋۇت ئەتراپىدا ئۇچقۇچىسىز ھاۋا ئاپپاراتى ئۇچۇرغانلىقىنى ئېيتتى.

دائىرىلەر، پارتلىغان باكتىكى تەخمىنەن 3 مىليون 400 مىڭ لىتىر (900 مىڭ گاللون) ئاق لىكۆرىنىڭ بارلىقىنى ۋە قىلىنغان سىناقلاردا بۇ بۇلغىنىشنىڭ ئەتراپتىكى كولۇمبىيە دەرياسىغا يېتىپ بارغانلىقىنى جەزملەشتۈردى، لېكىن ھاۋا سۈپىتىدە ياكى لوڭۋىيۇ شەھىرىنىڭ ئىچىملىك سۈيىدە «سەلبىي ساغلاملىق تەسىرى» بايقالمىغانلىقىنى بىلدۈردى.

سېتىش مىقدارى جەھەتتىن ياپونىيەنىڭ ئىككىنچى چوڭ قەغەز ئىشلەپچىقارغۇچىسى بولغان «Nippon Paper Industries»، لوڭۋىيۇ زاۋۇتىنى سېئاتىلغا جايلاشقان ياغاچ ماتېرىياللىرى شىركىتى «Weyerhaeuser» دىن 225 مىليون دوللارغا سېتىۋالغان ۋە 2016-يىلى يۈزدە يۈز پاي چەكلىك تارماق شىركىتى بولغان «Nippon Dynawave Packaging» نى قۇرغان ئىدى.