تۇرۇبا لىنىيەلىرى بىلەن نېفىت توشۇش پاي ھەسسىدارلىق شىركىتى (BOTAŞ) بىلەن ئەزەربەيجان دۆلەت نېفىت شىركىتى (SOCAR)، توتال ئېنېرگىيە (TotalEnergies) ۋە ئەبۇ زەبى دۆلەتلىك نېفىت شىركىتى (ADNOC)، ئەزەربەيجاندىن تۈركىيەگە 2029-يىلىدىن تارتىپ 15 يىل بويىچە جەمئىي 33 مىليارد كۇبمېتىر تەبىئىي گاز يەتكۈزىدىغان كېلىشىمگە ئىمزا قويدى.

تۈركىيە جۇمھۇرىيىتى ئېنېرگىيە ۋە تەبىئىي بايلىقلار مىنىستىرلىقىدىن ئېلان قىلىنغان باياناتقا قارىغاندا، تۈركىيە بىلەن ئەزەربەيجان ئوتتۇرىسىدىكى كۈچلۈك ئېنېرگىيە مۇناسىۋەتلىرى باكۇ ئېنېرگىيە ھەپتىلىكىدە يېڭى بىر باسقۇچقا قەدەم قويغان.

باكۇ ئېنېرگىيە مۇنبىرى رامكىسىدا ئىمزالانغان تەبىئىي گاز تەمىنات كېلىشىمى ئارقىلىق، ئابشېرون (Absheron) ساھەسىدىكى يېڭى ئىشلەپچىقىرىش مەبلەغلىرى دائىرىسىدە 2029-يىلىدىن باشلاپ تۈركىيەگە جەمئىي 33 مىليارد كۇبمېتىر تەبىئىي گاز يەتكۈزۈلىدۇ.

تۈركىيەنىڭ ئېنېرگىيەدە مەركىزىي دۆلەت بولۇش ئىستراتېگىيەسىنى قوللايدىغان بۇ قەدەمنىڭ، دۆلەتنىڭ، رايوننىڭ ۋە ياۋروپانىڭ ئېنېرگىيە تەمىنات بىخەتەرلىكىگە تۆھپە قوشۇشى نىشانلانماقتا.

ئېنېرگىيە ۋە تەبىئىي بايلىقلار مىنىستىرى ئالپارسلان بايراقتار، يانۋار ئېيىنىڭ بېشىدا ئەزەربەيجان بىلەن جەمئىي 33 مىليارد كۇبمېتىرلىق يېڭى بىر تەبىئىي گاز تەمىنات كېلىشىمى تۈزۈلگەنلىكىنى جاكارلاپ: «ئەزەربەيجاندىكى ئابشېرون ساھەسىدىن ھەر يىلى 2.25 مىليارد كۇبمېتىردىن 15 يىل بويىچە جەمئىي 33 مىليارد كۇبمېتىرلىق تەبىئىي گاز يەتكۈزۈش كېلىشىمى تۈزۈلدى»، دېدى.