تۈركىيە جۇمھۇرىيىتى تاشقى ئىشلار مىنىستىرلىقى باياناتچىسى ئۆنجۈ كەچەلى، گىرېتسىيەنىڭ ئەگە دېڭىزىنىمۇ ئۆز ئىچىگە ئالغان «يېڭىلىنىدىغان ئېنېرگىيە مەنبەلىرى مەخسۇس بوشلۇق رامكىسى» توغرىسىدا بايانات ئېلان قىلدى.
كەچەلى بۇ رامكىنىڭ ئىگىدارچىلىقى خەلقئارا شەرتنامىلەر ئارقىلىق گىرېتسىيەگە ئۆتكۈزۈپ بېرىلمىگەن جۇغراپىيەلىك شەكىللەرنىمۇ ئۆز ئىچىگە ئالغان ئەگە دېڭىزى مەسىلىلىرى جەھەتتە تۈركىيەنىڭ قانۇنىي مەيدانىغا تەسىر كۆرسەتمەيدىغانلىقىنى تەكىتلىدى.
ئۇ: «بۇرۇنمۇ تۈرلۈك پۇرسەتلەردە تەكىتلەپ ئۆتكىنىمىزدەك، بۇ ۋە بۇنىڭغا ئوخشاش تەشەببۇسلار تۈركىيەنىڭ ئەگە دېڭىزى مەسىلىلىرىگە دائىر قانۇنىي مەيدانىغا تەسىر كۆرسەتمەيدۇ» دېدى.
كەچەلى ئەگە دېڭىزى ۋە ئاقدېڭىزغا ئوخشاش يېپىق ياكى يېرىم يېپىق دېڭىزلاردا بىر تەرەپلىمە ھەرىكەتتىن ساقلىنىش كېرەكلىكىنى، خەلقئارا دېڭىز قانۇنىنىڭ قىرغاق دۆلەتلىرى ئوتتۇرىسىدىكى ھەمكارلىقنى ئىلگىرى سۈرىدىغانلىقىنى ئەسكەرتتى.
ئۇ يەنە تۈركىيەنىڭ گىرېتسىيە بىلەن ھەمكارلىشىشقا ھەر ۋاقىت تەييار ئىكەنلىكىنى بىلدۈرۈپ مۇنداق دېدى:
«تۈركىيە 2023-يىلى 7-دېكابىر ئېلان قىلىنغان ‹دوستانە مۇناسىۋەت ۋە ياخشى قوشنىدارچىلىق ھەققىدىكى ئافېنا خىتابنامىسى› دائىرىسىدە، مەسىلىلەرنى خەلقئارا قانۇن، ئادالەت ۋە ياخشى قوشنىدارچىلىق ئاساسىدا ھەل قىلىش ئۈچۈن سەمىمىي ۋە ئەتراپلىق پوزىتسىيە تۇتۇش كېرەك، دېگەن مەيدانىنى داۋاملىق ساقلاپ كەلمەكتە.»
