پەلەستىن قارشىلىق كۆرسىتىش تەشكىلاتى يەنە، ئۇرۇش توختىتىش كېلىشىمى دائىرىسىدە دۈشەنبە كۈنى قويۇپ بېرىلىدىغان 20 نەپەر ئىسرائىلىيەلىك ئەسىرنىڭ ئىسىملىكىنى ئېلان قىلدى.

ئىسرائىلىيە تاراتقۇسى 12-قانال، پەلەستىن قارشىلىق كۆرسىتىش تەشكىلاتى ھاماسنىڭ ئىسرائىلىيەلىك ئەسىرلەرنى قويۇپ بېرىشكە باشلىغانلىقىنى بىلدۈرۈپ، دۈشەنبە كۈنى، بۇ تەشكىلاتنىڭ ئۇرۇش توختىتىش كېلىشىمى دائىرىسىدە غەززەدە تۇنجى يەتتە ئىسرائىلىيەلىك گۆرۈگە ئېلىنغۇچىنى قىزىل كرىست جەمئىيىتىگە تاپشۇرۇپ بەرگەنلىكىنى خەۋەر قىلدى.

خەۋەرگە ئاساسلانغاندا، 13 نەپەر ئىسرائىلىيەلىك گۆرۈگە ئېلىنغۇچى غەززەنىڭ مەركىزىدىن سائەت 07:00 دە قويۇپ بېرىلىدىكەن.

ئىسرائىلىيە ئارمىيەسى، قىزىل كرىست جەمئىيىتى ئاپتوموبىل ئەترىتىنىڭ ھاماس تەرىپىدىن قويۇپ بېرىلىدىغان تۇنجى تۈركۈمدىكى ئىسرائىلىيەلىك ئەسىرلەرنى ئېلىپ كېتىش ئۈچۈن يولغا چىققانلىقىنى ئېلان قىلدى.

بۈگۈن ئەتىگەندە، ھاماسنىڭ قوراللىق قانىتى بولغان قاسسام بىرىگادىسى، غەززەدىكى ئۇرۇش توختىتىش ۋە ئەسىر ئالماشتۇرۇش كېلىشىمى دائىرىسىدە 20 نەپەر ئىسرائىلىيەلىك مەھبۇسنى تىرىك قويۇپ بېرىش قارارى ئالغانلىقىنى ئېلان قىلدى.

بۇ تەشكىلات قويۇپ بېرىلىدىغان مەھبۇسلارنىڭ ئىسىملىكىنى ئېلان قىلدى، ئەلقانە بوخبوت، ماتان ئەنگرېست، ئاۋىناتان ئور، يۈسۈپ-ھايىم ئوھانا، ئالون ئوھېل، ئەۋىياتار داۋۇد، گاي گىلبوئا-دالال، روم براسلاۋسكىي ۋە قوشكېزەكلەر گالى ۋە زىۋ بېرمان، ئەيتان مور، سېگېۋ كالفون، ماكسىم ھېركىن، ئەيتان ھورن، بار كۇپېرشتېين، ئۆمرى مىران ۋە قېرىنداشلار داۋىد كۇنىئو بىلەن ئارىئېل كۇنىئو.

ئىسرائىلىيە تاراتقۇلىرىنىڭ خەۋىرىگە ئاساسلانغاندا، ئەسىرلەرنى قويۇپ بېرىش ئىككى باسقۇچتا ئېلىپ بېرىلىدىكەن.

ئىككىنچى باسقۇچ، يەرلىك ۋاقىت ئەتىگەن سائەت 10:00 دە (GMT ۋاقتى 07:00) خان يۇنۇس رايونى ۋە غەززەنىڭ مەركىزىدىكى مۇساپىرلار لاگېرلىرىدىن ئېلىپ بېرىلىدۇ.

دۈشەنبە كۈنى ئىسرائىلىيەلىكلەر، تەل ئاۋىۋنىڭ پەلەستىن ئولتۇراق رايونىغا قاراتقان ئىككى يىللىق ۋەيران قىلغۇچ ئۇرۇشىدىن كېيىن، غەززەدىن ھايات قالغان ئاخىرقى 20 نەپەر گۆرۈگە ئېلىنغۇچىنى كۈتۈۋېلىشقا تەييارلانماقتا، پەلەستىنلىكلەرمۇ ئىسرائىلىيە تەرىپىدىن تۇتۇپ تۇرۇلۇۋاتقان يۈزلىگەن كىشىنىڭ قويۇپ بېرىلىشىنى كۈتمەكتە.

بۇ ئۆزگىرىش، ئامېرىكا پىرېزىدېنتى دونالد ترامپ ۋە مىسىر پىرېزىدېنتى ئابدۇلفەتتاھ سىسىنىڭ ئورتاق رىياسەتچىلىكىدە، غەززە ئۇرۇش توختىتىش توغرىسىدا ئۆتكۈزۈلىدىغان تىنچلىق باشلىقلار يىغىنىدىن بىر نەچچە سائەت بۇرۇن ئىشقا ئاشتى. باشلىقلار يىغىنى مىسىرنىڭ شارم ئەل-شەيخ شەھىرىدە ئۆتكۈزۈلىدۇ.

باشلىقلار يىغىنىغا، تۈركىيە جۇمھۇر رەئىسى رەجەپ تاييىپ ئەردوغان، فىرانسىيە جۇمھۇر رەئىسى ئېممانۇئېل ماكرون، ئىئوردانىيە پادىشاھى 2-ئابدۇللاھ، بەھرەيىن پادىشاھى ھەمەد بىن ئىسا ئال خەلىفە، ئەنگىلىيە باش مىنىستىرى كېيىر ستارمېر، ئىسپانىيە باش مىنىستىرى پېدرو سانچېز، ئىتالىيە باش مىنىستىرى جيورجيا مېلونى، پاكىستان باش مىنىستىرى شاھباز شەرىف ۋە گېرمانىيە باش مىنىستىرى فرىدرىخ مېرز قاتارلىق 20 دىن ئارتۇق دۇنيا رەھبىرىنىڭ قاتنىشىشى كۈتۈلمەكتە.