خىتاي جۈمە كۈنى ئافغانىستان بىلەن پاكىستاننى ئۇرۇش توختىتىشقا چاقىرىپ، بېجىڭنى «ناھايىتى ئەنسىرىتىۋاتقان» شىددەتلىك توقۇنۇشلارنى ئاخىرلاشتۇرۇش ئۈچۈن ھەر ئىككى تەرەپ بىلەن سۆھبەت ئۆتكۈزۈۋاتقانلىقىنى بىلدۈردى.
پاكىستان خىتاينىڭ رايوندىكى ئەڭ يېقىن ئىتتىپاقداشلىرىدىن بىرى، شۇنىڭ بىلەن بىر ۋاقىتتا بېجىڭ ئۆزىنى ئافغانىستاننىڭمۇ «دوست قوشنا دۆلىتى» دەپ تەسۋىرلەيدۇ.
خىتاي تاشقى ئىشلار مىنىستىرلىقىنىڭ باياناتچىسى ماۋ نىڭ، پاكىستاننىڭ جۈمە كۈنى پايتەخت كابۇلنىمۇ ئۆز ئىچىگە ئالغان ئافغانىستاندىكى چوڭ شەھەرلەرنى بومباردىمان قىلىشىدىن كېيىن، خىتاينىڭ «توقۇنۇشنىڭ ئەۋج ئېلىپ كېتىشىدىن قاتتىق ئەنسىرەۋاتقانلىقىنى» ئېيتتى.
ماۋ نىڭ مۇخبىرلارنى كۈتۈۋېلىش يىغىنىدا: «خىتاي ھەر ئىككى تەرەپنى سوغۇققان بولۇشقا ۋە سوغۇققانلىقنى ساقلاشقا... ئىمكانىيەتنىڭ بارىچە تېز پۇرسەتتە ئۇرۇش توختىتىشنى ئىشقا ئاشۇرۇپ، تېخىمۇ كۆپ قان تۆكۈلۈشىنىڭ ئالدىنى ئېلىشقا چاقىرىدۇ» دېدى.
باياناتچى ماۋ نىڭ سۆزلىرىگە ئىلاۋە قىلىپ: «خىتاي پاكىستان بىلەن ئافغانىستان ئوتتۇرىسىدىكى توقۇنۇشتا ئۆز قاناللىرى ئارقىلىق ئىزچىل مۇرەسسەچىلىك قىلىپ كەلدى ۋە جىددىيچىلىكنى پەسەيتىشتە ئىجابىي رول ئويناشنى داۋاملاشتۇرۇشنى خالايدۇ. مىنىستىرلىق ۋە خىتاينىڭ پاكىستان بىلەن ئافغانىستاندا تۇرۇشلۇق ئەلچىخانىلىرى بۇ مەسىلىدە مۇناسىۋەتلىك تەرەپلەر بىلەن بىرلىكتە خىزمەت ئىشلەۋاتىدۇ» دېدى.
ئوچۇق - ئاشكارا ئۇرۇش
پاكىستاننىڭ ئەڭ ئاخىرقى ھەربىي ھەرىكەتلىرى، ئافغانىستان كۈچلىرىنىڭ پەيشەنبە كۈنى كېچىدە ئىسلامئابادنىڭ ئىلگىرى ئېلىپ بارغان ھاۋا ھۇجۇملىرىغا قايتۇرما زەربە بېرىپ، پاكىستان چېگرا قىسىملىرىغا ھۇجۇم قىلىشىدىن كېيىن يۈز بەردى.
پاكىستان دۆلەت مۇداپىئە مىنىستىرى قوشنا دۆلەتلەر ئوتتۇرىسىدا «ئوچۇق - ئاشكارا ئۇرۇش» باشلانغانلىقىنى جاكارلىدى.
خىتاي بېجىڭنىڭ خەلقئارالىق «بىر بەلۋاغ بىر يول» تۈرىنىڭ بىر قىسمى بولغان غايەت زور قاتناش، ئېنېرگىيە ۋە ئۇل ئەسلىھە تۈرلىرىنى مەبلەغ بىلەن تەمىنلەش ئۈچۈن پاكىستانغا نەچچە ئون مىليارد دوللار مەبلەغ سالدى.
ئىسلامئاباد ماي ئېيىدىكى قىسقا مۇددەتلىك بىر توقۇنۇش جەريانىدا ھىندىستانغا قارشى، نۇرغۇنلىغان ئۇرۇش ئايروپىلانلىرىنى ئۆز ئىچىگە ئالغان خىتايدا ئىشلەنگەن ھەربىي جابدۇقلارنى ئىشلەتتى.
لېكىن ئانالىزچىلار، بېجىڭنىڭ چەت ئەل قوللىغان ھۆكۈمەتنى ئاغدۇرۇپ تاشلىغاندىن كېيىن 2021-يىلى ھاكىمىيەت بېشىغا قايتا چىققان مۇۋەققەت تالىبان ھاكىمىيىتىنىڭمۇ مۇھىم بىر شېرىكىگە ئايلانغانلىقىنى ئىلگىرى سۈرمەكتە.
باياناتچى ماۋ نىڭ جۈمە كۈنى ئېلان قىلغان باياناتىدا، خىتاينىڭ ھەر ئىككى دۆلەتتىن خىتاي پۇقرالىرىنىڭ، تۈرلىرىنىڭ ۋە ئورگانلىرىنىڭ بىخەتەرلىكىگە كاپالەتلىك قىلىشنى تەلەپ قىلغانلىقىنى، ۋەزىيەتنى يېقىندىن كۆزىتىۋاتقانلىقىنى ۋە ئېھتىياجى بار پۇقرالىرىغا ياردەم بېرىدىغانلىقىنى بىلدۈردى.
