سۈرىيە تاراتقۇلىرىنىڭ خەۋىرىگە ئاساسلانغاندا، ئىسرائىلىيە ئۇرۇش ئايروپىلانلىرى سۈرىيەنىڭ جەنۇبىدىكى سۇۋەيدا شەھىرىگە يېڭى بىر قېتىملىق ھاۋا ھۇجۇمى قوزغىغان.
سۈرىيەنىڭ دۆلەت ئىگىلىكىدىكى خەۋەر ئاگېنتلىقى سانا (SANA)، پەيشەنبە كۈنى كەچتە يۈز بەرگەن بۇ ھۇجۇمنىڭ شەھەر ئەتراپىنى زەربە ئوبيېكتى قىلغانلىقىنى بىلدۈرگەن بولسىمۇ، ئۆلگەنلەر، يارىلانغانلار ياكى كېلىپ چىققان زىيانلار ھەققىدە تەپسىلىي مەلۇمات بەرمىدى.
بۇ يېڭى ھۇجۇم، سۈرىيە ئىچكى ئىشلار مىنىستىرلىقىنىڭ شەھەردە يېڭى بىر ئۇرۇش توختىتىش كېلىشىمى ھاسىل قىلىنغانلىقىنى جەزملەشتۈرۈشىدىن بىر كۈن كېيىن يۈز بەردى. كېلىشىم، جەنۇبتىكى بۇ ئۆلكىنىڭ مەركىزىي ھۆكۈمەتنىڭ ھوقۇقىغا قايتىدىن ۋە تولۇق بىرلەشتۈرۈلۈشىنى مەزمۇن قىلىدۇ.
ئىسرائىلىيە دەمەشق باشتا بولۇپ، سۇۋەيدا ۋە دەرئا قاتارلىق رايونلارغا دۇرزى جامائەسىنى قوغداشنى باھانە قىلىپ ھۇجۇم قىلماقتا.
ئامېرىكا ھۇجۇملارنى قوللىمايدىغانلىقىنى ئېلان قىلدى
بۇ جەرياندا، ئامېرىكا قوشما ئىشتاتلىرى پەيشەنبە كۈنى بايانات ئېلان قىلىپ، ئىتتىپاقدىشى ئىسرائىلىيەنىڭ سۈرىيەدىكى ھۇجۇملىرىغا قارشى ئىكەنلىكىنى بىلدۈردى؛ بۇ بايانات ۋاشىنگتون ۋە ئەنقەرەنىڭ زوراۋانلىقنى ئاخىرلاشتۇرۇش ئۈچۈن كېلىشىم ھاسىل قىلىشىدىن بىر كۈن كېيىن ئېلان قىلىندى.
ئامېرىكا تاشقى ئىشلار مىنىستىرلىقى باياناتچىسى تەممىي برۇس مۇخبىرلارغا سۆز قىلىپ: «ئامېرىكا قوشما ئىشتاتلىرى يېقىنقى مەزگىلدىكى ئىسرائىلىيە ھۇجۇملىرىنى قوللىمىدى... بىز ھەم ھازىرقى كىرىزىسنى ھەل قىلىش، ھەم ئىككى ئىگىلىك ھوقۇقلۇق دۆلەت ئوتتۇرىسىدا مەڭگۈلۈك بىر كېلىشىم ھاسىل قىلىش ئۈچۈن ئىسرائىلىيە ۋە سۈرىيە بىلەن ئەڭ يۇقىرى دەرىجىلىك دىپلوماتىك ئالاقىلەرنى ئېلىپ بېرىۋاتىمىز» دېدى.
برۇس، ئامېرىكانىڭ ئىسرائىلىيەگە بۇ ئەھۋالدىن نارازىلىقىنى ئىپادىلەپ-ئىپادىلىمىگەنلىكى ياكى كەلگۈسىدىكى ھۇجۇملارغا قارشى تۇرۇپ-تۇرمايدىغانلىقى توغرىسىدا توختىلىشنى رەت قىلدى.
تاشقى ئىشلار مىنىستىرى ماركو رۇبىيو، ئىسرائىلىيەنىڭ دەمەشىقتىكى دۆلەت مۇداپىئە مىنىستىرلىقىغا قاراتقان ھۇجۇملىرىغا مۇناسىۋەتلىك سوئاللارغا جاۋاب بېرىپ، ئۆزىنىڭ ئەندىشىلىرىنى ئىپادىلىدى.
رۇبىيو كېيىنچە، ئىسرائىلىيەنىڭ ھۇجۇملىرىنى بىۋاسىتە تىلغا ئالمىغان، ئەمما زوراۋانلىققا مۇناسىۋەتلىك تېخىمۇ كەڭ دائىرىلىك ئەندىشىلەرنى ئىپادىلەيدىغان بىر بايانات ئېلان قىلدى.
ئىسرائىلىيە، ئىجتىمائىي توقۇنۇشلاردىن كېيىن دۇرزى جامائەسىگە ۋاكالىتەن ھەرىكەت قىلىۋاتقانلىقىنى ئىلگىرى سۈرمەكتە.
ئىسرائىلىيە، بەششار ئەسەد ھاكىمىيىتى ئاغدۇرۇلغاندىن بۇيان سۈرىيەگە ئىزچىل ھۇجۇم قىلىشنى داۋاملاشتۇرماقتا.
ئامېرىكا پىرېزىدېنتى دونالد ترامپ پەيشەنبە كۈنى ئىسرائىلىيە باش مىنىستىرى بېنيامىن نېتانياھۇ بىلەن تېلېفوندا كۆرۈشكەندە، تۈركىيە ۋە سەئۇدى ئەرەبىستان بىلەن بىرلىكتە، سۈرىيەنىڭ يېڭى رەھبىرى ئەھمەد شارا (شەرئ) بىلەن تېخىمۇ ياخشى مۇناسىۋەت ئورنىتىشنى پىلانلاۋاتقانلىقىنى بىلدۈردى.
