ئامېرىكا پىرېزىدېنتى دونالد ترامپ كانادا بىلەن بولغان بارلىق سودا سۆھبەتلىرىنى دەرھال توختاتقانلىقىنى ئېلان قىلىپ، كانادانى تاموژنا بېجىغا قارشى ئېلىپ بېرىلغان تەشۋىقات پائالىيىتىدە رونالد رېيگاننىڭ سۆزلىرىنى خاتا نەقىل كەلتۈرۈش بىلەن ئەيىبلىدى.
ترامپ پەيشەنبە كۈنى «Truth Social» سۇپىسىدا بايانات ئېلان قىلىپ: «كانادانىڭ بۇ ئېغىر قىلمىشىدىن كېيىن، كانادا بىلەن بولغان بارلىق سودا سۆھبەتلىرى ھازىردىن باشلاپ ئاخىرلاشتۇرۇلدى» دېدى.
ئۇ يەنە: «رونالد رېيگان فوندى جەمئىيىتى كانادانىڭ رونالد رېيگاننىڭ تاموژنا بېجى توغرىسىدا سەلبىي سۆزلەرنى قىلغانلىقىنى كۆرسىتىدىغان ساختا تەشۋىقات ئىشلەتكەنلىكىنى ئاشكارىلىدى» دېگەنلەرنى قەيت قىلدى.
شىمالىي ئامېرىكادىكى قوشنىلار ئوتتۇرىسىدىكى ئالاقىلەردە يۈز بەرگەن بۇ ئەڭ يېڭى جىددىيچىلىك، كانادا باش مىنىستىرى مارك كارنىينىڭ ئاق سارايدا ترامپنى زىيارەت قىلىپ، ئامېرىكانىڭ ئېغىر تاموژنا بېجىنى بوشىتىشىنى تەلەپ قىلغىنىدىن كەم دېگەندە ئىككى ھەپتە كېيىن يۈز بەردى.
رونالد رېيگان فوندى جەمئىيىتى «X» سۇپىسىدا ئېلان قىلغان باياناتىدا، ئونتارىيو ئىشتاتى ھۆكۈمىتىنىڭ رېيگاننىڭ 1987-يىلى 4-ئايدا سودا توغرىسىدا خەلقكە سۆزلىگەن رادىيو نۇتقىدىن مەلۇم «ئاۋاز ۋە سىن» بۆلەكلىرىنى تاللاپ ئىشلەتكەنلىكىنى كۆرسەتتى.
فوندى جەمئىيىتىنىڭ باياناتىدا، بۇ تەشۋىقاتنىڭ جۇمھۇرىيەتچى سابىق پىرېزىدېنتنىڭ نۇتقىدىكى سۆزلىرىنى «خاتا ئىپادىلىگەنلىكى» ۋە بۇنىڭغا قارىتا «قانۇنىي چارىلەرنى ئويلىشىۋاتقانلىقى» بايان قىلىندى.
تۇيۇقسىز ئۆزگىرىش
ترامپ بۇ تەشۋىقاتنىڭ «ئامېرىكا ئالىي سوت مەھكىمىسىنىڭ يەرشارى تاموژنا بېجىغا مۇناسىۋەتلىك قارارىغا تەسىر كۆرسىتىش ئۈچۈن پىلانلانغانلىقى»نى ئىلگىرى سۈردى.
سودا سۆھبەتلىرىنىڭ تۇيۇقسىز ئاخىرلىشىشى، ترامپ 7-ئۆكتەبىردە «دۇنيا مىقياسىدىكى بىر رەھبەر» دەپ تەسۋىرلىگەن ۋە ئۇنىڭ بىلەن سۆھبەتلىشىشتىن «تولىمۇ خۇشال» بولىدىغانلىقىنى ئېيتقان كارنىي ئۈچۈن بىر زەربە بولدى.
ئەمما ترامپ شۇ قېتىملىق سۆھبىتىدە تاموژنا بېجى مەسىلىسىدە قىلچىلىكمۇ يول قويمىغانىدى.
ئامېرىكا بىلەن كانادا ئوتتۇرىسىدىكى چېگرا ھالقىغان سودىنىڭ تەخمىنەن %85 ى، ھازىرقى شىمالىي ئامېرىكا سودا كېلىشىمى USMCA غا ئاساسەن، تاموژنا بېجىسىز داۋاملىشىدۇ. بىراق، ترامپنىڭ پولات، ئاليۇمىن ۋە ماشىنا قاتارلىق ساھەلەرگە قارىتىلغان يەرشارىۋى تاموژنا بېجى كاناداغا ئېغىر تەسىر كۆرسىتىپ، بۇ دۆلەتتە ئىش ئورنىنىڭ يوقىلىشىنى كەلتۈرۈپ چىقاردى ۋە كانادا كارخانىلىرىنى قىيىن ئەھۋالغا چۈشۈرۈپ قويدى.
