ئىسلام ھەمكارلىق تەشكىلاتى (ئى ھ ت) نىڭ كەشمىر ئالاقە گۇرۇپپىسى ب د ت ئومۇمىي كېڭىشى يىغىنى جەريانىدا نىيۇ يورکتا يىغىن ئاچتى.
بۇ گۇرۇپپا ھىندىستاننىڭ باشقۇرۇشىدىكى كەشمىر خەلقىنىڭ ئۆز تەقدىرىنى ئۆزى بەلگىلەش ھوقۇقىنى قوللايدىغانلىقىنى يەنە بىر قېتىم تەكىتلەپ، ماي ئېيىدا پاكىستان بىلەن ھىندىستان ئوتتۇرىسىدا تۆت كۈن داۋاملاشقان توقۇنۇشلاردىن كېيىن ئەمەلگە ئاشۇرۇلغان ئۇرۇش توختىتىشنى قارشى ئالىدىغانلىقىنى بىلدۈردى.
پاكىستان تاشقى ئىشلار مىنىستىرلىقىنىڭ باياناتىغا ئاساسلانغاندا، 80-نۆۋەتلىك ئومۇمىي كېڭەش يىغىنى دائىرىسىدە ئۆتكۈزۈلگەن بۇ يىغىنغا ئى ھ ت باش كاتىپىدىن سىرت، ئەزەربەيجان، پاكىستان، تۈركىيە، سەئۇدى ئەرەبىستان ۋە نىگېرنىڭ تاشقى ئىشلار مىنىستىرلىرى ۋە يۇقىرى دەرىجىلىك ۋەكىللىرى قاتناشقان.
يىغىندا، جەنۇبىي ئاسىيادىكى ھەربىي جىددىيچىلىكتىن «چوڭقۇر ئەندىشە» قىلىنىۋاتقانلىقى ئىپادىلىنىپ، رايوننىڭ مۇقىمسىزلىشىشىنى كەلتۈرۈپ چىقىرىدىغان ھەرىكەتلەردىن ساقلىنىش ۋە «ئەڭ كۈچلۈك دەرىجىدە سوغۇققان بولۇش» قا چاقىرىق قىلىندى.
بارلىق دۆلەتلەرنىڭ ۋاسىتىچىلىك تىرىشچانلىقلىرىنى «ئىجابىي» دەپ قارايدىغانلىقىنى بىلدۈرگەن بۇ گۇرۇپپا، پاكىستان بىلەن ھىندىستان ئوتتۇرىسىدىكى ئۇرۇش توختىتىشقا يۇقىرى باھا بەردى. يادرو قورالىغا ئىگە بۇ ئىككى دۆلەت ئوتتۇرىسىدا يۈز بەرگەن توقۇنۇشلار نەتىجىسىدە ئونلارچە كىشى چېگرا ھالقىغان باشقۇرۇلىدىغان بومبا ھۇجۇملىرىدا ھاياتىدىن ئايرىلغاندىن كېيىن، ئامېرىكا پىرېزىدېنتى دونالد ترامپ ئۇرۇش توختىتىلغانلىقىنى ئېلان قىلغانىدى.
ئى ھ ت گۇرۇپپىسى رايون تىنچلىقىنىڭ «جاممۇ ۋە كەشمىر ماجىراسىنىڭ ب د ت خەۋپسىزلىك كېڭىشى قارارلىرى ۋە كەشمىر خەلقىنىڭ ئىرادىسىگە ئاساسەن ئۈزۈل-كېسىل ھەل قىلىنىشى» غا باغلىق ئىكەنلىكىنى تەكىتلىدى.
گۇرۇپپا ھىندىستاننى سىياسىي مەھبۇسلارنى قويۇپ بېرىشكە، «چەكلىگۈچى ۋە باستۇرغۇچى قانۇنلار» نى ئەمەلدىن قالدۇرۇشقا ۋە جاممۇ-كەشمىرگە مۇناسىۋەتلىك ب د ت خەۋپسىزلىك كېڭىشى قارارلىرىنى ئىجرا قىلىشقا چاقىردى.
يېڭى دېھلى ئى ھ ت گۇرۇپپىسىنىڭ باياناتىغا ھازىرغىچە ھېچقانداق ئىنكاس قايتۇرمىدى.
