سەيشەنبە كۈنى پارلامېنتقا سۇنۇلغان يېڭى «كۆچمەنلىك ۋە پاناھلىق ئىشلىرى قانۇن لايىھەسى» پىلانىدىن ئورۇن ئالغان بۇ بەلگىلىمە، يېتەرلىك كىرىمگە ئېرىشكەن قۇرامىغا يەتكەنلەرنىڭ بۇ سوممىنى بۆلۈپ تۆلىشىنى مەجبۇرىي قىلىدۇ.

ئەنگلىيەدە ئىشلەش ھوقۇقى بولغان پاناھلىق تىلىگۈچىلەرنى ئۆز ئىچىگە ئالغان بۇ قەرز، كىشىلەرنىڭ دۆلەتتە مەڭگۈلۈك ئولتۇراقلىشىش ھوقۇقىغا ئېرىشىشىدىن بۇرۇن پۈتۈنلەي قايتۇرۇلۇپ بولۇشى كېرەك.

ئىچكى ئىشلار ۋەزىرى شابانا مەھمۇد پاناھلىق ياردىمىنىڭ بىر ھوقۇق بولۇش بىلەن بىرگە مەسئۇلىيەتنىمۇ ئۆز ئىچىگە ئالىدىغانلىقىنى بىلدۈرۈپ، كىشىلەر تۆھپە قوشالايدىغان ئەھۋالغا كەلگەندە ئەنگلىيە خەلقىنىڭ خۇش پېئىللىقىنىڭ بەدىلىنى قايتۇرۇشىنى كۈتىدىغانلىقلىرىنى بىلدۈردى.

پىلانغا ئاساسەن، پاناھلىق ئىلتىماسى رەت قىلىنغان ئەمما دۆلەتتە قالغان كىشىلەرنىڭمۇ كىرىمى بېكىتىلگەن چەكتىن ئاشقان تەقدىردە، بۇ خىراجەتلەر ئۇلاردىن يىغىۋېلىنىدۇ.

ئىچكى ئىشلار ۋىزارىتىنىڭ سانلىق مەلۇماتلىرىغا قارىغاندا، دۆلەتتە ئۆتكەن يىلى پاناھلىق تىلىگۈچىلەرنى قوللاش ئۈچۈن تەخمىنەن 4 مىليارد ستېرلىڭ خەجلەنگەن.

مۇساپىرلار كېڭىشىگە ئوخشىغان ئاممىۋى تەشكىلاتلار بۇ پىلاننى مۇساپىرلارغا سېلىنغان قوشۇمچە بىر باج دەپ ئاتاپ ئادالەتسىز دەپ قارىسا، ئوكسفورد ئۇنىۋېرسىتېتى كۆچمەنلەرنى كۆزىتىش مەركىزىدىكى مۇتەخەسسىسلەر بولسا مۇساپىرلار ئارىسىدىكى خىزمەتكە ئورۇنلىشىش نىسبىتىنىڭ تۆۋەنلىكى سەۋەبىدىن ھۆكۈمەت نىشان قىلغان مەبلەغنى يىغىشنىڭ تەسلىكىنى بىلدۈرمەكتە.

ئۆكتىچى مۇھاپىزىكارلار پارتىيەسى بولسا ئىشچىلار پارتىيەسى ھۆكۈمىتىنىڭ بۇ سىياسەتنى ئۆزلىرىدىن كۆچۈرگەنلىكىنى ئىلگىرى سۈرمەكتە.