يىغىننىڭ ئىيوردانىيە پادىشاھى 2-ئابدۇللاھنىڭ قاتنىشىشى بىلەن ئېچىلىدىغان بىرىنچى بۆلۈمىدە ئوتتۇرا شەرقتىكى كىرىزىس ۋە ناتو بىلەن ئىيوردانىيە ئوتتۇرىسىدىكى ھەمكارلىق مەسىلىلىرى مۇزاكىرە قىلىنىدۇ.
فىداننىڭ يىغىندا سۈرىيەدىكى تېررورچى گۇرۇپپىلارنىڭ مەۋجۇتلۇقىنى ئۆز ئىچىگە ئالغان ساقلىنىۋاتقان كۆپ تەرەپلىمىلىك مەسىلىلەرنىڭ مۇقىمسىزلىقنى كەلتۈرۈپ چىقىرىۋاتقانلىقىنى، ناتونىڭ شەرقىي جەنۇبىي قانىتى بولغان تۈركىيەنىڭ رايوندىكى مۇقىمسىزلىقنىڭ تارقىلىپ كەتمەسلىكىنى ئاساس قىلغان پوزىتسىيەسىنى قوللاشنىڭ مۇھىملىقىنى، ھەمدە سۈرىيەدىكى ۋەزىيەتنى دۆلەتنىڭ زېمىن پۈتۈنلۈكى، بىرلىكىنى ساقلاش ۋە تېررورلۇققا قارشى تۇرۇش نۇقتىسىدىن كۆزىتىۋاتقانلىقىنى بىلدۈرۈشى تەكىتلىشى كۈتۈلمەكتە.
فىداننىڭ ئىسرائىلىيە سادىر قىلغان ئۇرۇش جىنايەتلىرى ۋە غەززەدىكى تىراگېدىيەلەر شۇنداقلا تۈركىيەنىڭ ئىسرائىلىيە-پەلەستىن مەسىلىسىگە تۇتۇۋاتقان مەيدانىنى ئوتتۇرىغا قويۇشى كۈتۈلمەكتە. ئۇ يەنە ئوتتۇرا شەرقتىكى كىرىزىس ۋە ئۇرۇشلارنىڭ قوشۇمچە تەسىرلىرىنىڭ تېررورىزمنىڭ تارقىلىشىغا سەۋەب بولۇۋاتقانلىقىنى ئوتتۇرىغا قويۇپ، تۈركىيەنىڭ ناتو بىلەن ئىيوردانىيە ئوتتۇرىسىدىكى ھەمكارلىقنىڭ كۈچەيتىلىشىنى، جۈملىدىن ئامماندا ئالاقە ئىشخانىسىنىڭ ئېچىلىشىنى قوللايدىغانلىقىنى قايتا تىلغا ئېلىپ ئۆتىدۇ.
ناتو-ئۇكرائىنا كېڭىشى فورماتىدا ئۆتكۈزۈلىدىغان يىغىنغا ئۇكرائىنا تاشقى ئىشلار مىنىستىرى ئاندرېي سىبىھا ۋە ياۋروپا ئىتتىپاقى تاشقى ئىشلار ھەم بىخەتەرلىك سىياسىتى ئالىي ۋەكىلى كايا كاللاس قاتنىشىدۇ. يىغىندا رۇسىيە-ئۇكرائىنا ئۇرۇشىنىڭ نۆۋەتتىكى ۋەزىيىتىمۇ مۇزاكىرە قىلىنىدۇ.
مىنىستىر فىداننىڭ يىغىندا تۈركىيەنىڭ ئۇكرائىنانىڭ ئىگىلىك ھوقۇقى، مۇستەقىللىقى ۋە زېمىن پۈتۈنلۈكىگە بولغان قوللىشىنى يەنە بىر قېتىم تەكىتلىشى، ئۇرۇشنى ئاخىرلاشتۇرۇش ئۈچۈن دىپلوماتىك سۆھبەتكە يول قويۇش كېرەكلىكىنى ئوتتۇرىغا قويۇشى كۈتۈلمەكتە. شۇنىڭ بىلەن بىرگە، ياۋروپا ئىتتىپاقىنىڭ ياۋروپا ئىتتىپاقىغا ئەزا بولمىغان ئىتتىپاقداشلارغا بەرگەن يازما ۋەدىلىرىگە ئەمەل قىلىشى كېرەكلىكىنىمۇ ئەسكەرتىدۇ.
يىغىننىڭ پەقەت ئىتتىپاقداشلارنىڭ قاتنىشىشى بىلەن ئۆتكۈزۈلىدىغان ئاخىرقى قىسمىدا ياۋروپا-ئاتلانتىك رايونىغا قارىتىلغان خەۋپ-خەتەرلەر ۋە چېگراداش رايونلاردىكى جىددىيچىلىكلەر مۇزاكىرە قىلىنىدۇ.
مىنىستىر فىداننىڭ 2023-يىلى ۋىلنيۇس ۋە 2024-يىلى ۋاشىنگتوندا ئېلىنغان قارارلار بويىچە، ئىتتىپاقداشلار ئارىسىدىكى مۇداپىئە مەھسۇلاتلىرى سودىسىغا توسالغۇ بولۇۋاتقان بارلىق قىيىنچىلىقلارنى بىكار قىلىش ۋە تېرورىزمغا قارشى كۈرەشتە «تولۇق ھەمكارلىق»نىڭ مۇھىملىقىنى تەكىتلىشى كۈتۈلمەكتە.
فىداننىڭ يىغىن داۋامىدا باشقا دۆلەتلەرنىڭ تاشقى ئىشلار مىنىستىرلىرى بىلەن ئىككى تەرەپلىمىلىك سۆھبەتلەرنى ئۆتكۈزۈشى پىلانلانغان. بۇ يىغىن 1-ئۆكتەبىردە باش كاتىپلىق ۋەزىپىسىنى ئۈستىگە ئالغان مارك رۇتتېنىڭ قاتنىشىشىدىكى تۇنجى تاشقى ئىشلار مىنىستىرلىرى يىغىنى بولىدۇ.
