چىكاگو شەھەر باشلىقى براندون جونسون، تۈرك-ئامېرىكا جەمئىيىتىنىڭ شەھەرنىڭ مەدەنىيەت، ئىجتىمائىي ۋە ئىقتىسادىي ھاياتىغا قوشقان كەڭ كۆلەملىك تۆھپىلىرى سەۋەبىدىن ئاۋغۇست ئېيىنى رەسمىي تۈردە «تۈرك مىراسلىرى ئېيى» ئېلان قىلدى.
رەسمىي ئۇقتۇرۇش تۈرك مىراسلىرى ۋە مەدەنىيىتىنىڭ چىكاگو ۋە ئۇنىڭ سىرتىدا كۈنسېرى ئېشىۋاتقان تەسىرىنى ئېتىراپ قىلىش دائىرىسىدە، تۈرك فېستىۋالى مەدەنىيەت مىراسلىرى قۇرۇلتىيى كومىتېتىنىڭ رەئىسى خەلىل دەمىرگە تاپشۇرۇپ بېرىلدى.
ئۇقتۇرۇشتا تۈرك مەدەنىيىتى، تارىخى، ئەنئەنىلىرى، تائاملىرى، مۇزىكىسى ۋە جەمئىيەتكە قىلغان خىزمەتلىرىنى تەبرىكلەشنىڭ مۇھىملىقى قەيت قىلىندى. شۇنداقلا، جەمئىيەتلەرنى بىر يەرگە جەم قىلىدىغان، دوستلۇق، خىلمۇخىللىق ۋە مەدەنىيەتلەر ئوتتۇرىسىدىكى چۈشىنىشنى ئىلگىرى سۈرىدىغان پائالىيەتلەرنىڭ مەدەنىيەت جەھەتتىكى ئەھمىيىتى تەكىتلەندى.
خەلىل دەمىر ئۇقتۇرۇشنى تۈرك فېستىۋالى كومىتېتىغا ۋاكالىتەن قوبۇل قىلىپ، ئامېرىكالىق تۈركلەرنى بۇ ئەھمىيەتلىك قارار بىلەن شەرەپلەندۈرگەن شەھەر باشلىقى براندون جونسونغا ۋە چىكاگو شەھىرىگە مىننەتدارلىق بىلدۈردى.
تۈرك فېستىۋالى كومىتېتى، بۇ قارارنىڭ ئامېرىكالىق تۈركلەرن ئۈچۈن پەخىرلىنەرلىك بىر ئۆزگىرىش ۋە تۈركىيە - ئامېرىكا قوشما ئىشتاتلىرى ئوتتۇرىسىدىكى مەدەنىيەت رىشتىنى كۈچەيتىش يۆنىلىشىدىكى مۇھىم بىر قەدەم ئىكەنلىكىنى تىلغا ئالدى.
