تۈركىيە جۇمھۇرىيىتى تاشقى ئىشلار مىنىستىرى خاقان فىدان ئامېرىكا تاشقى ئىشلار مىنىستىرى ماركو رۇبىيو بىلەن ئۆتكۈزگەن تېلېفون سۆھبىتىدە، ئىسرائىلىيەنىڭ سۈرىيەدىكى ھەرىكەتلىرىنىڭ رايوننىڭ تىنچلىقى ۋە بىرلىكىگە ئېغىر زىيان يەتكۈزۈۋاتقانلىقىنى، سۈرىيەدىكى توقۇنۇشلارنى دەرھال ئاخىرلاشتۇرۇشنىڭ تەخىرسىزلىكىنى ئالاھىدە تەكىتلىدى.
تاشقى ئىشلار مىنىستىرى خاقان فىدان شەنبە كۈنى ئەتىگەندە ئامېرىكا تاشقى ئىشلار مىنىستىرى ماركو رۇبىيو بىلەن تېلېفوندا سۆھبەتلىشىپ، سۈرىيەنىڭ جەنۇبىدىكى جىددىي ۋەزىيەتنى مۇزاكىرە قىلدى.
تۈركىيە دىپلوماتىيە مەنبەلىرىنىڭ بىلدۈرۈشىچە، مىنىستىر فىدان سۆھبەت جەريانىدا سۈرىيەدىكى توقۇنۇشنى ئاخىرلاشتۇرۇش ۋە تەرەپلەر ئارىسىدا ئىلگىرى ھاسىل قىلىنغان ئۇرۇش توختىتىش كېلىشىمىنى قوغداشنىڭ زۆرۈرلۈكىنى تەكىتلىگەن.
فىدان يەنە ئىسرائىلىيەنىڭ سۈرىيە زېمىنىدا ئېلىپ بېرىۋاتقان ھەربىي ھەرىكەتلىرىنىڭ رايوندىكى مۇقىمسىزلىقنى كۈچەيتىۋەتكەنلىكىنى، بۇنىڭ سۈرىيەنىڭ بىرلىكى ۋە ئىگىلىك ھوقۇقىغا، شۇنداقلا پۈتكۈل رايوننىڭ تىنچلىقىغا ئېغىر تەھدىت ئېلىپ كېلىۋاتقانلىقىنى بىلدۈرگەن.
مىنىستىر فىدان تۈركىيەنىڭ سۈرىيەنىڭ جەنۇبىدىكى سەزگۈر ۋەزىيەتتىن پايدىلىنىپ، ھەرقانداق بىر تېررورلۇق تەشكىلاتىنىڭ باش كۆتۈرۈشىگە ھەرگىز يول قويمايدىغانلىقىنى تەكىتلەپ ئۆتكەن. ئۇ يەنە ئەنقەرەنىڭ ۋاشىنگتوننىڭ سۈرىيەدىكى ئىجابىي رولىنى قوللايدىغانلىقىنى، مەڭگۈلۈك تىنچلىقنى ئىشقا ئاشۇرۇش ئۈچۈن ئامېرىكا ۋە باشقا ئىتتىپاقداشلىرى بىلەن ھەمكارلىشىشقا تەييار ئىكەنلىكىنى سۆزلىرىگە ئىلاۋە قىلغان.
تاشقى ئىشلار مىنىستىرى فىدان ھازىرقى باسقۇچنىڭ سۈرىيەنى قايتا قۇرۇپ چىقىش ۋە سۈرىيە خەلقى ئۈچۈن بىخەتەر كەلگۈسى يارىتىشتا مۇھىم بىر پۇرسەت يارىتىپ بەرگەنلىكىنى ئالاھىدە تىلغا ئالغان.
سۆھبەتتە يەنە غەززەدىكى ئىنسانپەرۋەرلىك كىرىزىسى ۋە داۋاملىشىۋاتقان نازۇك ئۇرۇش توختىتىش سۆھبەتلىرى قاتارلىق مەسىلىلەرمۇ مۇزاكىرە قىلىنغان.
فىدان سۆھبەتنىڭ ئاخىرىدا تۈركىيەنىڭ تېزدىن ۋە مەڭگۈلۈك ئۇرۇش توختىتىش ھاسىل قىلىش ھەققىدىكى چاقىرىقىنى يەنە بىر قېتىم تەكرارلاپ، قورشاۋدا قالغان پەلەستىن خەلقىگە ئىنسانپەرۋەرلىك ياردەم بۇيۇملىرىنى يەتكۈزۈشنىڭ تەخىرسىز بىر ئېھتىياج ئىكەنلىكىنىمۇ ئالاھىدە تەكىتلىگەن.
