زېلېنسكىي ئىجتىمائىي تاراتقۇ ھېساباتىدا، رۇسىيەنىڭ تۈنۈگۈن كىيېۋغا باشقۇرۇلىدىغان بومبا ۋە قوراللىق ئۇچقۇچىسىز ھاۋا ئاپپاراتلىرى بىلەن ئېلىپ بارغان ھۇجۇمىغا ئالاقىدار ئۇچۇر ھەمبەھىرلىدى.

ئۇكرائىنا پىرېزىدېنتى ۋولودىمىر زېلېنسكىي، رۇسىيە ئارمىيەسى پايتەخت كىيېۋغا 24-مايدا قويۇق ھاۋا ھۇجۇمى ئېلىپ بارغاندىن كېيىن ئىزدەش-قۇتقۇزۇش خىزمەتلىرىنىڭ داۋاملىشىۋاتقانلىقىنى بىلدۈردى.

كىيېۋنىڭ ئىككى رايونىدا ئىزدەش-قۇتقۇزۇش خىزمەتلىرىنىڭ داۋاملىشىۋاتقانلىقىنى بىلدۈرگەن زېلېنسكىي: «كىيېۋدا تەخمىنەن 300 بىنا زىيانغا ئۇچرىدى. بۇلارنىڭ كۆپىنچىسى تۇرالغۇ ئۆيلەر ئىدى» دېدى.  

زېلېنسكىي، ھۇجۇم سەۋەبىدىن كىيېۋدا 2 كىشىنىڭ ھاياتىدىن ئايرىلغانلىقىنى، 3 ى كىچىك بالا بولۇپ 87 كىشىنىڭ يارىلانغانلىقىنى قەيت قىلدى.

ئۇكرائىنا پىرېزىدېنتى زېلېنسكىي تۈنۈگۈنكى ھۇجۇملار سەۋەبىدىن جەمئىي 6 رايوندا ۋەيرانچىلىق يۈز بەرگەنلىكىنى بىلدۈردى.

رۇسىيە بىر كېچىدىلا ئۇكرائىناغا 262 قوراللىق ئۇچقۇچىسىز ھاۋا ئاپپاراتى بىلەن ھۇجۇم قىلدى.

يەنە بىر تەرەپتىن، ئۇكرائىنا ھاۋا ئارمىيەسى قوماندانلىقى تەرىپىدىن ئېلان قىلىنغان يازما باياناتتا، رۇسىيە ئارمىيەسىنىڭ تۈنۈگۈن كېچە دۆلەتكە ئوخشىمىغان تىپتىكى 262 قوراللىق ئۇچقۇچىسىز ھاۋا ئاپپاراتى بىلەن ھۇجۇم قىلغانلىقى ئۇقتۇرۇلدى.

ھاۋا مۇداپىئە كۈچلىرى تەرىپىدىن 246 ئۇچقۇچىسىز ئايروپىلاننىڭ يۆق قىلىنغانلىقى قەيت قىلىنغان باياناتتا، قالغان ئۇچقۇچىسىز ئايروپىلانلارنىڭمۇ دۆلەت مىقىياسىدىكى 9 نۇقتىغا تەككەنلىكى بىلدۈرۈلدى.

رۇسىيە مۇداپىئە مىنىستىرلىقىدىن 24-مايدا ئېلان قىلىنغان باياناتتا، رۇسىيەگە قارىتىلغان «تېررورلۇق ھۇجۇملىرى» غا جاۋابەن ئۇكرائىنادىكى ھەربىي نىشانلارغا ھاۋا ھۇجۇملىرىنى قىلغانلىقى ئۇقتۇرۇلغان ئىدى.

مىنىستىرلىق ھۇجۇملاردا ھەربىي نۇقتىلارنىڭ ۋە مۇداپىئە سانائىتى ئۇل ئەسلىھەلىرىنىڭ نىشان قىلىنغانلىقىنى بىلدۈرگەن بولسىمۇ، ئۇكرائىنا دۆلەت پىرېزىدېنتى زېلېنسكىي، مۇزېي، بازار، مەكتەپ ۋە ئاپارتامېنتلارغا ئوخشاش پۇقرالار ئۇل ئەسلىھەلىرىنىڭ زىيانغا ئۇچرىغانلىقىنى ئېلان قىلغان ئىدى.