تاشقى ئىشلار مىنىستىرلىقى مەنبەلىرىدىن ئېلىنغان مەلۇماتلارغا ئاساسلانغاندا، تۈركىيە جۇمھۇرىيىتى تاشقى ئىشلار مىنىستىرى خاقان فىدان ھاماس شۇرا مەجلىسىنىڭ رەئىسى مۇھەممەد دەرۋىش رەھبەرلىكىدىكى ھاماس ۋەكىللەر ئۆمىكى بىلەن كۆرۈشكەن.

ئۇچرىشىشتا غەززەدە ئۇزۇن مۇددەتلىك تىنچلىق ئورنىتىش ئۈچۈن داۋاملىشىۋاتقان خىزمەتلەر، غەززەگە ئىنسانپەرۋەرلىك ياردەم يەتكۈزۈش ئۈچۈن ئېلىپ بېرىلىۋاتقان پائالىيەتلەر ۋە رايوندىكى باشقا تەرەققىياتلار مۇزاكىرە قىلىنغان.

تاشقى ئىشلار مىنىستىرى فىدان رايوندىكى ئۇرۇشنىڭ پەلەستىن مەسىلىسىنىڭ ئۇنتۇلۇپ كېتىشىگە سەۋەب بولماسلىقى كېرەكلىكىنى، تۈركىيەنىڭ غەززە ۋە غەربىي قىرغاقتا ئىسرائىلىيە كەلتۈرۈپ چىقارغان پاجىئەلەرنى خەلقئارا جەمئىيەتنىڭ كۈنتەرتىپىدە تۇتۇشنى داۋاملاشتۇرىدىغانلىقىنى بىلدۈردى.

مىنىستىر فىدان ئىسرائىلىيەنىڭ غەززەدىكى مەۋجۇتلۇقىنى ئاشۇرۇشى ۋە غەززەگە ئېھتىياجلىق بولغان ئىنسانپەرۋەرلىك ياردەملەرنىڭ رايونغا يېتىپ بېرىشىغا توسقۇنلۇق قىلىشىنىڭ قوبۇل قىلغىلى بولمايدىغانلىقىنى قەيت قىلدى.

ئىسلام دۆلەتلىرى قاتاارلىق پەلەستىننى قوللايدىغان بارلىق دۆلەتلەرنىڭ پەلەستىنلىكلەرنىڭ ھەقلىق دەۋاسىنى قوغداشنى داۋاملاشتۇرۇشى كېرەكلىكىنى تەكىتلىگەن مىنىستىر فىدان، تۈركىيەنىڭ بۇ يۆنىلىشتىكى تىرىشچانلىقلارغا داۋاملىق باشلامچىلىق قىلىدىغانلىقىنى بىلدۈردى.

تۈركىيەنىڭ پەلەستىن خەلقىنىڭ غەززەدىن ئايرىلىشىنى نىشان قىلغان ھەر قانداق قەدەمگە قارشى قەتئىيلىك بىلەن كۈرەش قىلىشنى داۋاملاشتۇرىدىغانلىقىنى ئېيتتى.