جۇمھۇر رەئىس رەجەپ تاييىپ ئەردوغان مۇستەقىللىق ئۇرۇشىنىڭ شېھىتلەر ۋە غازىلارنىڭ مىسلىسىز پىداكارلىقلىرى ۋە تۈركىيە خەلقىنىڭ قەتئىي ئىرادىسى بىلەن غەلىبە قىلغانلىقىنى ئېيتتى.
تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان ئىستانبۇلنىڭ دۈشمەن ئىشغالىيىتىدىن ئازاد قىلىنغانلىقىنىڭ 102 – يىللىقى مۇناسىۋىتى بىلەن، مۇستەقىللىق كۈرىشىدە جان پىدا قىلغان شېھىتلەر ۋە غازىلارنى چەكسىز ئىپتىخارلىق تۇيغۇسى ئىچىدە ياد ئەتتى.
جۇمھۇر رەئىس ئەردوغان دۈشەنبە كۈنى تۈركىيەنىڭ ئاممىۋى ئورتاقلىشىش تور بېتى NSosyal سەھىپىسىدە ئېلان قىلغان باياناتىدا، تۈركىيە خەلقىگە تەبرىك تىلەكلىرىنى يەتكۈزۈپ، مۇستەقىللىق ئۇرۇشىنىڭ «ۋەتەننى جېنىدىنمۇ ئەزىز بىلىدىغان شېھىتلەر ۋە غازىلارنىڭ مىسلىسىز پىداكارلىقلىرى»، «تۈركىيە خەلقىنىڭ مۇستەقىللىقى ھەم ئەركىنلىكىنى قوغداش يولىدىكى قەتئىي ئىرادىسى» سايىسىدا غەلىبە قىلغانلىقىنى تەكىتلەپ مۇنداق دېدى:
«بۇ مۇبارەك ئاڭغا ئاساسەن، مىسلىسىز مەدەنىيىتىمىزنىڭ مىراسى ئۈستىگە قۇرۇلغان جۇمھۇرىيىتىمىزنى قولغا كەلتۈرگەن نەتىجىلىرى بىلەن قوغداش، ساقلاپ قېلىش، زامانىۋى مەدەنىيەتلەر سەۋىيەسىدىن ئۈستۈن قىلىش، يېڭى مۇۋەپپەقىيەتلەر بىلەن تېخىمۇ كۈچەيتىش ئارقىلىق كەلگۈسىگە يەتكۈزۈش ئۈچۈن زور ئىرادە بىلەن تىرىشىشنى داۋاملاشتۇرىۋاتىمىز.»
جۇمھۇر رەئىس ئەردوغان يەنە، بۇ دۆلەتنىڭ ئەركىنلىكى ئۈچۈن كۈرەش قىلغانلارنى ھۆرمەت بىلەن ياد ئېتىدىغانلىقىنى بىلدۈرۈپ مۇنداق دېدى:
«بۇ ئىشەنچ بىلەن مۇستەقىللىق ئۇرۇشىمىزنىڭ بارلىق قەھرىمانلىرىنى چەكسىز ئىپتىخارلىق تۇيغۇسى ئىچىدە ھۆرمەت بىلەن ياد ئەتىمەن. ئىستانبۇلنىڭ شەرەپ كۈنىنى قايتا تەبرىكلەيمەن، بارلىق پۇقرالىرىمىزغا چىن دىلىمدىن قىزغىن سالام يوللايمەن.»
ئىستانبۇل 1923 – يىلى 10 – ئاينىڭ 6 – كۈنى ئۇدا تۆت يىل داۋاملاشقان ئىتتىپاقداش دۆلەتلەرنىڭ ئىشغالىيىتىنىڭ ئاخىرلىشىشى بىلەن ئازاد قىلىنغان بولۇپ، بۇ تارىخ جۇمھۇرىيەتنىڭ شۇ ئايدا ئېلان قىلىنىشىغىمۇ يول ئاچقان ئىدى.
