تۈركىيە تاشقى ئىشلار مىنىستىرلىقى يەمەندىكى ھۇسىيلارنىڭ مەدىنە مۇنەۋۋەرەدە مەسجىدى نەبەۋىگە مۇلازىمەت قىلىدىغان پۇقراۋى ئۇل ئەسلىھەلەرگە قىلغان ھۇجۇمىنى قاتتىق ئەيىبلىدى.
مىنىستىرلىق ھۇسىيلارنىڭ سەئۇدى ئەرەبىستانغا قىلغان ھۇجۇمى ھەققىدە يازما بايانات ئېلان قىلىپ، مۇنداق دېدى: «ھۇسىيلارنىڭ مەدىنە مۇنەۋۋەرەدە مەسجىدى نەبەۋىگە مۇلازىمەت قىلىدىغان پۇقراۋى ئۇل ئەسلىھەلەرگە قىلغان ھۇجۇمىنى قاتتىق ئەيىبلەيمىز. سەئۇدى ئەرەبىستاننىڭ ئىگىلىك ھوقۇقى ۋە بىخەتەرلىكىگە تەھدىت سېلىۋاتقان، ئىسلام دۇنياسىنىڭ مۇقەددەس جايلىرىنى زەربە ئوبيېكتى قىلغان بۇ ئىغۋاگەرچىلىك ھۇجۇملىرى دەرھال ۋە شەرتسىز توختىتىلىشى كېرەك.»
تۈركىيەنىڭ سەئۇدى ئەرەبىستاننى قەتئىي قوللايدىغانلىقى قايتا تەكىتلەنگەن باياناتتا، رايوندىكى جىددىيچىلىكنى تېخىمۇ كۈچەيتىدىغان قەدەملەردىن ساقلىنىش كېرەكلىكى بىلدۈرۈلدى.
سەئۇدى ئەرەبىستان باشچىلىقىدىكى ئەرەب ئىتتىپاقداش قىسىملىرى تۈنۈگۈن بايانات ئېلان قىلىپ، يەمەندىكى ھۇسىيلارنىڭ ئۈچ كۈن ئىلگىرى سەئۇدى ئەرەبىستاننىڭ مەدىنە شەھىرىدىكى تەيبە ئېلېكتىر ئىستانسىسىنى ئۇچقۇچىسىز ھاۋا ئاپپاراتى بىلەن نىشان قىلغانلىقىنى بىلدۈرگەنىدى.
