ئىسپانىيە ئاخبارات ئاگېنتلىقى EFE نىڭ خەۋىرىگە قارىغاندا، دۇنيا مىقياسىدا 1000دىن ئارتۇق ئالىم، ئاساسلىقى پىسخولوگلار ۋە نېرۋا سىستېمىسى ئىلمى مۇتەخەسسىسلىرى پەلەستىننىڭ غەززە رايونىدا ئۇرۇش توختىتىش چاقىرىقى قىلغان ۋە خەلقئارا جەمئىيەتنىڭ ئىسرائىلىيەگە خەلقئارا ئىنسانپەرۋەرلىك قانۇنىغا ھۆرمەت قىلىشى ئۈچۈن بېسىم ئىشلىتىشىنى تەلەپ قىلغان بىر ئوچۇق خەتكە ئىمزا قويغان.
ئىمزا قويغۇچىلار ئارىسىدا نورۋېگىيەلىك نوبېل مۇكاپاتى ساھىبى ماي-برىت موسېر بىلەن ئېدۋارد موسېر ۋە ياپونىيەلىك سۇسۇمۇ تونېگاۋا قاتارلىقلارمۇ بار.
كاخال ئىنستىتۇتىدىن سۈنئىي ئەقىل ۋە روبوت گۇرۇپپىسىنىڭ ئەزاسى پابلو لانىللوس قاتارلىق بىرقانچە ئىسپانىيەلىك تەتقىقاتچىمۇ ئوچۇق خەتكە ئىمزا قويدى.
لانىللوس ئىسپانىيە ئاخبارات ئاگېنتلىقى EFE گە بەرگەن باياناتىدا مۇنداق دەيدۇ:
«بۇ چاقىرىقنىڭ تەسىرى ناھايىتى كۈچلۈك بولىدۇ، چۈنكى بۇ چاقىرىقنى نېرۋا ئىلمى مۇتەخەسسىسلىرى قىىلىۋاتىدۇ؛ چوڭ مېڭىنىڭ بۇ خىلدىكى توقۇنۇشلارنى قانداق قوبۇل قىلىدىغانلىقى ۋە بىر تەرەپ قىلىدىغانلىقىنى تەتقىق قىلىدىغان مۇتەخەسسىسلەر قىلىۋاتىدۇ.
ئوچۇق خەتتە، ھاماسنىڭ 2023-يىلى 7-ئۆكتەبىردىكى ھۇجۇملىرى، يەھۇدىيلارنى تۇتقۇن قىلىش ۋە بىر يىلدىن ئارتۇق ۋاقىت بۇرۇن باشلانغان توقۇنۇشتىن تارتىپ غەززەدە 48 مىڭدىن ئارتۇق كىشىنى ئۆلتۈرگەن ئىسرائىلىيەنىڭ ئۆتكۈزگەن «سان - ساناقسىز ئۇرۇش جىنايەتلىرى» قاتارلىق بارلىق تەرەپلەرنىڭ قىلغان زوراۋانلىقلىرى ئەيىبلەنمەكتە.
«تىنچلىق پۈتكۈل خەلقلەرنىڭ بىرلىكتە ياشاش مەنبەسىدۇر»
ئالىملار رايوننىڭ تىنچلىق ئىچىدە بىرگە ياشاش ئېھتىماللىقىنى يوققا چىقىرىدىغان ۋەيران قىلغۇچى زوراۋانلىقلار ۋە ئىنتىقام ئېلىش چەمبىرىكىگە قاپسىلىپ قالغانلىقىنى، «نەپرەت، ئۆلۈم ۋە ۋەيرانچىلىق» نىڭ ھەممە ياقنى قاپلاپ كەتكەنلىكىنى تەكىتلىمەكتە.
ئىسپانىيە ئاخبارات ئاگېنتلىقى EFE نىڭ خەۋىرىگە قارىغاندا، ئوچۇق خەتتە ئىنسان پىسخولوگىيەسىنىڭ دائىم توقۇنۇشقۇچى گۇرۇپپىلار ئارىسىدىكى پەرقلەرنى كۈچەيتىدىغانلىقى، شۇنىڭ بىلەن بىر ۋاقىتتا، ئومۇميۈزلۈك ھېسداشلىق ۋە ھەمكارلىق ئىقتىدارىغا ئىشارەت قىلىدىغانلىقى ئەسكەرتىلمەكتە.
ئالىملار خەلقئارا جەمئىيەتنى ئىسرائىلىيەگە ئۇرۇشىنى ئاخىرلاشتۇرۇش ئۈچۈن بېسىم ئىشلىتىشكە چاقىرماقتا؛ بۇ چاقىرىق ئىسرائىلىيەگە قورال سېتىشنى توختىتىش ياكى ئىسرائىلىيە بىلەن ھەمكارلىق كېلىشىملىرى تۈزۈشنى قايتا ئويلىنىش قاتارلىق تەلەپلەرنىمۇ ئۆز ئىچىگە ئالىدۇ.
ئوچۇق خەتتە مۇنداق دېيىلمەكتە:
«بىز ئىسرائىلىيە خەلقىگە قارشى ئەمەسمىز. مەيلى ئىسرائىلىيەلىكلەر بولسۇن، مەيلى پەلەستىنلىك ۋە لىۋانلىقلار بولسۇن، بارلىق خەلقلەر ھەردائىم بىزنىڭ دوستىمىزدۇر.»
ئالىملار ئىسرائىلىيەنىڭ نۆۋەتتىكى سىياسەتلىرىنىڭ پەلەستىنلىكلەرگە ئورنىنى تولدۇلغىلى بولمايدىغان ئېغىر زىيانلارنى يەتكۈزۈۋاتقانلىقىنى ۋە ئۆز خەلقىنىڭ بىخەتەرلىكىنى خەۋپكە ئىتتىرىۋداتقانلىقىنى ئوتتۇرىغا قويماقتا.
بۇ ئوچۇق خەت فىرانسىيەدىكى سوربوننې ئۇنىۋېرسىتېتى بىلەن ئامېرىكادىكى پىرىنستون ئۇنىۋېرسىتېتىدىكى تەتقىقاتچىلار تەرىپىدىن ئېلان قىلىنغان.
