جاڭجى ۋىلايىتىنىڭ چىنيۈەن ناھىيەسىدىكى بىر كۆمۈر كاندا، ئەتىگەندە گاز تۈپەيلىدىن ئېغىر پارتلاش ۋەقەسى يۈز بەردى. 247 ئىشچى ئىشلەۋاتقانلىقى بىلدۈرۈلگەن كاندا، دەسلەپكى ئېنىقلاشلارغا قارىغاندا 82 ئىشچى جېنىدىن ئايرىلغان. كان ئاستىدا قاپسىلىپ قالغان ئىشچىلارنى قۇتقۇزۇش ۋە ئىزدەش خىزمەتلىرى ئۈزلۈكسىز داۋاملىشىۋاتقان بولۇپ، قازا قىلغۇچىلار سانىنىڭ تېخىمۇ كۆپىيىپ كېتىشىدىن ئەندىشە قىلىنماقتا.
خىتاي دۆلەت رەئىسى شى جىنپىڭ ئېلان قىلغان باياناتىدا، ئىزدەش-قۇتقۇزۇش خىزمەتلىرى ئۈچۈن پۈتكۈل كۈچىلەرنى سەپەرۋەر قىلىش ۋە يارىدارلارنى داۋالاش يۈزىسىدىن جىددىي يۆتكىلىش بۇيرۇقى بەردى. خىزمەتلەرنىڭ تەرتىپلىك ئېلىپ بېرىلىشىنى تەلەپ قىلغان شى جىنپىڭ، پارتلاشنىڭ كېلىپ چىقىش سەۋەبىگە قارىتا ئەتراپلىق تەكشۈرۈش ئېلىپ بېرىش ۋە جاۋابكارلارنى قانۇن ئالدىدا ھېساباتقا تارتىش چاقىرىقىدا بولدى. مەملىكەت مىقياسىدىكى بارلىق يەرلىك ھۆكۈمەتلەرنىڭ ۋە مۇناسىۋەتلىك ئورگانلارنىڭ بۇ ۋەقەدىن چوڭقۇر دەرس ئېلىشى ھەمدە ئىشلەپچىقىرىش بىخەتەرلىك تەدبىرلىرىنى يۇقىرى كۆتۈرۈشى كېرەكلىكى تەرەپكە دىققەت تارتىپ، چوڭ تىپتىكى ۋەقەلەرنىڭ ئالدىنى ئېلىش ئۈچۈن يوشۇرۇن خەۋپلەرنى ئالدىن ئېنىقلاپ بىر تەرەپ قىلىشنىڭ مۇھىملىقىنى تەكىتلىدى. ۋەقەگە ئائىت تەكشۈرۈشلەر داۋاملاشماقتا.
