دمىترىي پەسكوۋ پايتەخت موسكۋادا مۇخبىرلارنىڭ كۈنتەرتىپتىكى بەزى مەسىلىلەرگە مۇناسىۋەتلىك سوئاللىرىغا جاۋاب بەردى.
ياۋروپا ئىتتىپاقىنىڭ تاشقى مۇناسىۋەت ۋە خەۋپسىزلىك سىياسىتىگە مەسئۇل ئالىي ۋەكىلى كاجا كاللاسنىڭ رۇسىيەگە يېڭى ئېمبارگولارنى يۈرگۈزۈش ۋە موسكۋاغا قىلىنىۋاتقان بېسىمنى ئاشۇرۇش ھەققىدىكى باياناتىغا باھا بەرگەن پەسكوۋ: «رۇسىيە بېكىتىلگەن نىشانلارغا يېتىش ئۈچۈن كىيېۋ ھاكىمىيىتىگە قىلىنىۋاتقان بېسىمنى داۋاملىق كۈچەيتىدۇ» دېدى.
پەسكوۋ رۇسىيە باش ئىشتاب باشلىقى ۋالېرىي گېراسىموۋنىڭ، ئۇكرائىنانىڭ پايتەختى كىيېۋ ۋە باشقا ئولتۇراق رايونلاردىكى نىشانلارغا قارىتا ئېلىپ بېرىلغان قويۇق ھۇجۇملارنىڭ نەتىجىسى توغرىسىدا رۇسىيە پىرېزىدېنتى ۋلادىمىر پۇتىنغا مەلۇمات بەرگەنلىكىنى ئەسكەرتتى.
ھۇجۇملارنىڭ پەقەت ھەربىي ياكى ھەربىي جەھەتتىن چېتىشلىقى بار نىشانلارغا قارىتىلغانلىقىنى ئەسكەرتكەن دمىترىي پەسكوۋ، ياۋروپانىڭ بولسا رۇسىيە بىلەن بولغان جىددىيچىلىكنى ئەۋج ئالدۇرۇۋاتقانلىقىنى ئېيتتى.
رۇسىيە ياۋروپا ئىتتىپاقىنىڭ «قوراللىنىش» ۋە رۇسىيە بىلەن توقۇنۇشۇش يولىغا كىرگەنلىكىنى، موسكۋانىڭ بۇ ئۆزگىرىشلەرگە سۈكۈت قىلىپ تۇرالمايدىغانلىقىنى قەيت قىلدى.
ئۇكرائىنا ھاۋا ئارمىيە قوماندانلىق ئىشتابى ئېلان قىلغان باياناتىدا، رۇسىيە ئارمىيەسىنىڭ بۈگۈن ئۇكرائىناغا 74 دانە باشقۇرۇلىدىغان بومبا ۋە 496 دانە قوراللىق ئۇچقۇچىسىز ھاۋا ئاپپاراتى بىلەن ھۇجۇم قىلغانلىقىنى ئۇقتۇرغان ئىدى.
