تۈركىيە مۇداپىئە سانائىتى ماگناتى ئاسەلسان دۈشەنبە كۈنى ئاسىيا-تىنچ ئوكيان رايونىدا پائالىيەت قىلىدىغان بىر خېرىدار بىلەن 171 مىليون دوللار قىممىتىدە خەلقئارالىق سېتىش كېلىشىمنى ئىمزالىغانلىقىنى ئۇقتۇردى.
شىركەت تۈركىيەنىڭ ئاممىۋى ئۇچۇر ئاشكارىلاش سۇپىسى (KAP) دا ئېلان قىلغان باياناتىدا، كېلىشىمنىڭ ئىنسانسىز دېڭىز ئۈستى ۋاسىتىلىرى ئۈچۈن ئالاقە سىستېمىلىرى ۋە يۈك سىستېمىلىرىنى ئېكسپورت قىلىشنى ئۆز ئىچىگە ئالىدىغانلىقىنى ئۇقتۇردى، ئەمما خېرىدارنىڭ ئىسمى ئاشكارىلانمىدى.
مەركىزى تۈركىيەنىڭ پايتەختى ئەنقەرەگە جايلاشقان ئاسەلسان 1975-يىلى قۇرۇلغان بولۇپ، دۆلەتنىڭ ئەڭ چوڭ مۇداپىئە شىركەتلىرىدىن بىرى ھېسابلىنىدۇ، ھەمدە دۇنيا مىقياسىدا ئۆز ساھەسى بويىچە ئالدىنقى 50 شىركەت قاتارىدىن ئورۇن ئالىدۇ.
«Defence News Top 100» تىزىملىكىدە 42-ئورۇندا تۇرىدىغان ئاسەلسان، قوشۇلما قىممىتى يۇقىرى ئېكسپورتنى كېڭەيتىش ۋە خەلقئارالىق زاكاز فوندىنى كۈچەيتىش ئارقىلىق يەر شارى خاراكتېرلىك تەسىرىنى ئاشۇرۇپ، ئالدىنقى 30 شىركەت قاتارىدىن ئورۇن ئېلىشنى نىشان قىلماقتا.
ئاسەلسان 2025-يىلى تۈرلۈك كېلىشىملەرنى ئىمزالىغان بولۇپ، يېقىندا ئېلان قىلىنغان توققۇز ئايلىق مالىيە كۆرسەتكۈچىگە ئاساسلانغاندا، خەلقئارالىق سېتىشتىن 1 مىليارد 400 مىليون دوللار قىممىتىدە كۈتۈلۈۋاتقان زاكاز شەكىللەندۈرگەن.
بۇ رەقەم ئالدىنقى يىلىنىڭ ئوخشاش مەزگىلىگە سېلىشتۇرغاندا % 171 لىك ئېشىشتىن دېرەك بېرىدۇ. ئاسەلساننىڭ يېڭى ئىمزالانغان كېلىشىملىرىنىڭ تەخمىنەن % 25 ى بىۋاسىتە ۋە ۋاسىتىلىك چەت ئەلگە سېتىش سودىسىدىن تەشكىل تاپىدۇ.
