ئىران: «ئامېرىكا سىرىلانكا قىرغاقلىرىدا زەربە بەرگەن كېمىدە 104 ئەسكەر ئۆلدى»
ئىران ئارمىيەسى، ئۇرۇش پاراخوتىنىڭ ھىندىستاندىكى «مىلان تىنچلىق 2026» (Milan Peace 2026) ناملىق دېڭىز ئارمىيە مانېۋىرىدىن قايتىۋاتقاندا، سىرىلانكا ئوچۇق دېڭىزىدا ھۇجۇمغا ئۇچرىغانلىقىنى خەۋەر قىلدى.
ئىران ئارمىيەسى، ئىران ئۇرۇش پاراخوتى «IRIS Dena» نىڭ 104 نەپەر خادىمىنىڭ ئۆتكەن ھەپتە ئامېرىكانىڭ ھۇجۇمىدا ھاياتىدىن ئايرىلغانلىقىنى، 32 كىشىنىڭ يارىلانغانلىقىنى ئېلان قىلدى.
دۆلەتلىك خەۋەر ئاگېنتلىقى IRNA نىڭ خەۋىرىگە قارىغاندا، ئارمىيە تەرەپ يەكشەنبە كۈنى بايانات ئېلان قىلىپ، پاراخوتنىڭ ھىندىستاندىكى مانېۋىردىن قايتىۋاتقاندا 4-مارت كۈنى سىرىلانكا قىرغاقلىرىدا ئامېرىكا دېڭىز ئارمىيەسى تەرىپىدىن ھۇجۇمغا ئۇچرىغانلىقىنى بىلدۈردى.
ۋاشىنگتون تەرەپ بىر ئامېرىكا سۇ ئاستى پاراخوتىنىڭ ئىران پاراخوتىغا تورپېدو ھۇجۇمى قىلغانلىقىنى دەلىللىدى.
سىرىلانكا دائىرىلىرى گاللې (Galle) شەھىرىنىڭ جەنۇبىي قىرغاقلىرىدا پاراخوتتىن ياردەم چاقىرىقى تاپشۇرۇۋالغاندىن كېيىن، بىرلىكتە قۇتقۇزۇش ھەرىكىتىنى باشلىغانلىقىنى خەۋەر قىلدى. شۇنداقلا يارىلانغان 32 خادىمنىڭ يەرلىك بىر دوختۇرخانىغا يۆتكەلگەنلىكىنى قوشۇمچە قىلدى.