«ۋول سترېت ژۇرنىلى»نىڭ خەۋىرىگە قارىغاندا، ترامپ ھۆكۈمىتى خەلقئارا جىنايى ئىشلار سوت مەھكىمىسىگە كەڭ دائىرىلىك ئىقتىسادىي جازا يۈرگۈزۈشكە تەييارلانماقتا.
گېزىتنىڭ بىلدۈرۈشىچە، ئامېرىكا پىلانلاۋاتقان بۇ جازالار ئالتە ئايدىن يەتتە ئايغىچە داۋاملىشىدىغان ئۆتكۈنچى باسقۇچتىن كېيىن، مەزكۇر خەلقئارا سوت مەھكىمىسى بىلەن ئېلىپ بېرىلىدىغان كۆپ قىسىم پۇل-مۇئامىلە ۋە سودا مۇئامىلىلىرىنى چەكلەيدۇ.
پىلانلىنىۋاتقان جازالار ترامپ ھۆكۈمىتىنىڭ جازالاش ھەرىكىتىنى زور دەرىجىدە كۈچەيتىدىغانلىقىدىن دېرەك بېرىدۇ. چۈنكى ھۆكۈمەت سوت خادىملىرىنى ئايرىم-ئايرىم زەربە ئوبيېكتى قىلىشتىن ھالقىپ، پۈتۈن ئورگاننى قاپلايدىغان كەڭ چەكلىمىلەرنى يولغا قويۇش باسقۇچىغا ئۆتمەكتە.
خەۋەردە تىلغا ئېلىنغان مەنبەلەرنىڭ بىلدۈرۈشىچە، ۋاشىنگتون بۇ مەمۇرىي تەدبىرلەرنى مۇشۇ ھەپتە بىرلەشكەن دۆلەتلەر تەشكىلاتى ئومۇمىي كېڭىشى يىغىنى مەزگىلىدە ياكى ئۇنىڭدىن كېيىنلا ئاخىرقى نۇسخىغا كەلتۈرۈشى مۇمكىن.
ۋاشىنگتون 2025-يىلى فېۋرالدا سوت جەريانلىرىنى سەۋەب قىلىپ، دۆلەت مىقياسىدا جىددىي ھالەت ئېلان قىلغان پىرېزىدېنت پەرمانىغا ئاساسەن، خەلقئارا جىنايى ئىشلار سوت مەھكىمىسىنىڭ باشلىقى توموكو ئاكانېنى ئۆز ئىچىگە ئالغان نۇرغۇن سوت خادىمىغا جازا يۈرگۈزگەنىدى.
بۇ بېسىم ھەرىكىتى خەلقئارا جىنايى ئىشلار سوت مەھكىمىسىنىڭ 2024-يىلى غەززەدىكى ئۇرۇش جىنايەتلىرى ۋە ئىنسانىيەتكە قارشى جىنايەتلەر سەۋەبلىك بىنيامىن نېتانياھۇ بىلەن سابىق دۆلەت مۇداپىئە مىنىستىرى يوئاۋ گاللانت ئۈستىدىن تۇتۇش بۇيرۇقى چىقارغاندىن كېيىن باشلانغان.
گېزىتنىڭ خەۋىرىگە قارىغاندا، ئامېرىكا تاشقى ئىشلار مىنىستىرلىقىنىڭ باياناتچىسى ئېھتىماللىق دائىرىسىدىكى جازا قارارلىرى ھەققىدە ئالدىن مەلۇمات بېرىشنى رەت قىلغان.
خەلقئارا جىنايى ئىشلار سوت مەھكىمىسى ئالدىنقى ئايدا ئامېرىكانىڭ سوت مەھكىمىسى باشلىقى ۋە تەپتىش مەھكىمىسىدىكى يۇقىرى دەرىجىلىك بىر ئادۋوكاتقا قارشى يېڭى جازالىرىنى قاتتىق رەت قىلىپ، بۇ تەدبىرلەرنى ئەدلىيە مۇستەقىللىقىغا قارىتىلغان «ئوچۇق-ئاشكارا ھۇجۇم» دەپ ئاتىغانىدى.
ترامپ ھۆكۈمىتى بۇ جازالارنى، مەزكۇر سوتنىڭ ئافغانىستاندىكى ئامېرىكا خادىملىرى ئۈستىدىن ئېلىپ بارغان تەكشۈرۈشى ۋە ئىسرائىلىيەنىڭ يۇقىرى دەرىجىلىك ئەمەلدارلىرى ئۈستىدىن چىقارغان تۇتۇش بۇيرۇقلىرىغا قايتۇرۇلغان ئىنكاس سۈپىتىدە يولغا قويغان.
لاھەيدىكى سوت مەھكىمىسىنىڭ باياناتىدا، ئەڭ يېڭى جازا تىزىملىكىدە ياپونىيەلىك سوت باشلىقى توموكو ئاكانې بىلەن تەپتىش مەھكىمىسىدە يۇقىرى دەرىجىلىك سوت ئادۋوكاتى بولۇپ ئىشلەۋاتقان سېنېگاللىق ئابدۇلاي سېيېنىڭ زەربە ئوبيېكتى قىلىنغانلىقى بىلدۈرۈلدى.
