خىتاي تاموژنا ئىدارىسىنىڭ باياناتىغا ئاساسلانغاندا، ياپونىيە دېڭىز مەھسۇلاتلىرى ئىمپورتىغا قارىتىلغان ئۇزۇن يىللىق چەكلەش قىسمەن ئەمەلدىن قالدۇرۇلغان. ئىدارىنىڭ يەكشەنبە كۈنى ئېلان قىلغان باياناتىدا، مەزكۇر قارارنىڭ خەلقئارالىق ۋە دۆلەت ئىچىدىكى ئەۋرىشكىلەرنى ئۇزۇن مۇددەت تەكشۈرۈش جەريانىدا ھېچقانداق بىنورماللىق بايقالمىغانلىقى ئۈچۈن چىقىرىلغانلىقى بىلدۈرۈلدى.
شۇنىڭ بىلەن بىرگە، توكيو ۋە فۇكۇشىمانى ئۆز ئىچىگە ئالغان ياپونىيەنىڭ 10 رايونىدىن كېلىدىغان بەزى دېڭىز مەھسۇلاتلىرىنىڭ خىتايغا ئىمپورت قىلىنىشى يەنىلا چەكلەنمەكتە.
بۇ ئومۇميۈزلۈك چەكلەش، توكيو ئېلېكتىر ئېنېرگىيە شىركىتىنىڭ 2023-يىلى 8-ئايدا فۇكۇشىما يادرو ئېلېكتىر ئىستانسىسىدىن تازىلانغان رادىيوئاكتىپلىق كېرەكسىز سۇنى تىنچ ئوكيانغا قويۇپ بېرىشكە باشلىغاندىن كېيىن يولغا قويۇلغانىدى.
چەكلىمىنى قىسمەن بىكار قىلىش قارارى بولسا، ياپونىيە ھۆكۈمىتىنىڭ خىتايغا ئېكسپورت قىلىنىدىغان مەھسۇلاتلارنىڭ بىخەتەرلىكى ۋە سۈپىتىگە كاپالەتلىك قىلغاندىن كېيىن قوبۇل قىلىندى.
ئىگىلىنىشىچە، ئېكسپورتچىلارنىڭ خىتايغا ئېكسپورت قىلىدىغان مەھسۇلاتلىرى ئۈچۈن ياپونىيە ھۆكۈمىتىدىن رادىيوئاكتىپلىق ماددىلارغا مۇناسىۋەتلىك تەكشۈرۈش گۇۋاھنامىسى ئېلىشى شەرت ئىكەن.
«The Japan Times» گېزىتىنىڭ خەۋىرىگە قارىغاندا، ياپونىيە 10 رايونغا قارىتىلغان چەكلىمىنىڭ پۈتۈنلەي بىكار قىلىنىشى ئۈچۈن خىتايغا بېسىم ئىشلىتىشنى داۋاملاشتۇرىدىغانلىقىنى ئېلان قىلغان.
