دونالد ترامپ ئىرانغا قارشى ھەربىي ھەرىكەتتىن كېيىن «نۆۋەت» نىڭ كۇباغا كېلىدىغانلىقىنى تەكىتلىدى ۋە كارىب دېڭىزىغا جايلاشقان بۇ دۆلەتنىڭ يېقىندا گۇمران بولۇشقا يۈزلىنىدىغانلىقىنى ئېيتتى.
ترامپ يەكشەنبە كۈنى ۋاشىنگتونغا كېتىۋاتقان پىرېزىدېنت ئايروپىلانىدا مۇخبىرلارغا بەرگەن باياناتىدا: «كېيىنكى دۆلەت كۇبا بولىدۇ» دېدى.
كۇبانى «بىر قالايمىقانچىلىق دۆلىتى» دەپ سۈپەتلىگەن ترامپ مۇنداق دېدى: «كۇبا ۋەيران بولغان دۆلەت بولۇپ، ئىراندىن كېيىن نۆۋەت كۇباغا كېلىدۇ، دەرۋەقە، كۇبا قىسقا ۋاقىت ئىچىدە گۇمران بولىدۇ، بىز ئۇلارغا ياردەم بېرىش ئۈچۈن ئۇ يەردە بولىمىز، كۇبالىق ئامېرىكالىقلارغا ياردەم بېرىش ئۈچۈن ئۇ يەردە بولىمىز.»
رۇسىيە نېفىتى بىلەن مۇناسىۋەتلىك «مەسىلە يوق»
ترامپ نىيۇ يورك تايمىس گېزىتىنىڭ رۇسىيەنىڭ بىر نېفىت توشۇش پاراخوتىنىڭ كۇباغا يېتىپ بېرىشىغا رۇخسەت قىلىنىدىغانلىقى ھەققىدىكى خەۋىرىگە ئالاقىدار سوئالغا، بۇنىڭ بىلەن مۇناسىۋەتلىك بىر «مەسىلە يوق» دەپ جاۋاب بەردى.
ترامپ: «بىرسىنىڭ بىر پاراخوت نېفىت سېتىۋېلىشىغا قارشى تۇرمايمىز، چۈنكى ئۇلارنىڭ ياشىشى كېرەك. ئەگەر بىر دۆلەت ھازىر كۇباغا ئازراق نېفىت ئەۋەتمەكچى بولسا، مەيلى رۇسىيە بولسۇن ياكى باشقا دۆلەت بولسۇن، مەن ئۈچۈن مەسىلە يوق» دېدى.
ئامېرىكا پىرېزىدېنتى ترامپ بۇنىڭ رۇسىيە پىرېزىدېنتى ۋلادىمىر پۇتىنغا پايدىسى بولىدىغان-بولمايدىغانلىقى مەسىلىسىدە بولسا، ھېچقانداق پايدىسى بولمايدىغانلىقىنى ئېيتتى.
ترامپ سۆزلىرىگە ئىلاۋە قىلىپ: «(پۇتىن) بىر پاراخوت نېفىتنى يوقىتىدۇ، بۇنىڭدا مەسىلە يوق. ئەگەر ئۇ بۇنى قىلىشنى خالىسا ۋە باشقا دۆلەتلەرمۇ قىلىشنى خالىسا، مېنى ئانچە بىئارام قىلمايدۇ. بۇنىڭ ھېچقانداق تەسىرى بولمايدۇ؛ كۇبا تۈگەشتى، ئۇلارنىڭ ناچار بىر ھاكىمىيىتى بار، ئىنتايىن ناچار ۋە چىرىكلەشكەن بىر باشقۇرۇش قاتلىمى بار، شۇڭا ئۇلارنىڭ بىر پاراخوت نېفىت سېتىۋېلىش-سېتىۋالماسلىقىنىڭ ئەھمىيىتى بولمايدۇ. رۇسىيەدىن ياكى باشقا دۆلەتتىن بولسۇن، نېفىتنىڭ كىرىشىگە رۇخسەت قىلىشنى ئەلا بىلىمەن، چۈنكى كىشىلەرنىڭ ئىسسىققا، سوۋۇتۇشقا ۋە باشقا نەرسىلەرگە ئېھتىياجى بار» دېدى.
