ئامېرىكا تاراتقۇلىرى يەكشەنبە كۈنى مەركىزىي قوماندانلىق ئىشتابىدىن نەقىل ئېلىپ ئېلان قىلغان خەۋەرلەردە بىلدۈرۈلۈشىچە، ئىران پورتلىرىغا يۈرگۈزۈلگەن قورشاۋنى بۆسۈپ ئۆتۈشكە ئۇرۇنغانلىقى سەۋەبىدىن ئامېرىكا تەرىپىدىن توسۇپ قېلىنغان بىر پاراخوت خادىملىرى بىلەن بىرلىكتە ئىرانغا قايتۇرۇلۇش ئۈچۈن پاكىستانغا تاپشۇرۇپ بېرىلگەن.

«ABC News» قانىلىنىڭ مەركىزىي قوماندانلىق ئىشتابى باياناتچىسى يۈزبېشى تىم خاۋكىنس (Tim Hawkins) تىن نەقىل كەلتۈرۈشىچە، ئامېرىكا قىسىملىرى بۈگۈن «M/V Touska» ناملىق پاراخوتتىكى 22 نەپەر خادىمنىڭ ئۆز دۆلىتىگە قايتۇرۇلۇشى ئۈچۈن پاكىستانغا يۆتكەش خىزمىتىنى تاماملىغان. خاۋكىنس سۆزىدە يەنە ئۆتكەن ھەپتە ئالتە نەپەر يولۇچىنىڭمۇ ئۆز دۆلىتىگە قايتۇرۇلۇشى ئۈچۈن رايوندىكى بىر دۆلەتكە يۆتكەلگەنلىكىنى تىلغا ئالدى.

ئىران دۆلەت تاراتقۇلىرى بۇ ئالتە كىشىنىڭ پاراخوت خادىملىرىنىڭ ئائىلە تاۋابىئاتلىرى ئىكەنلىكىنى بىلدۈردى. نۆۋەتتە مەركىزىي قوماندانلىق ئىشتابى بۇ خەۋەرنى دەلىللەش تەلىپىگە تېخى جاۋاب قايتۇرمىدى؛ شۇنىڭ بىلەن بىر ۋاقىتتا پاكىستان ۋە ئىران ئەمەلدارلىرىمۇ خەۋەرنى رەسمىي دەلىللىمىدى.

ئامېرىكا دېڭىز ئارمىيەسى 19-ئاپرېل ئومان قولتۇقىدا قورشاۋ بۇيرۇقلىرىغا رىئايە قىلىشنى رەت قىلغانلىقى ئىلگىرى سۈرۈلگەن «Touska» ناملىق پاراخوتنى قولغا چۈشۈرگەن ئىدى.