خىتاينىڭ گاللىي، گېرمانىي ۋە سۈرمە قاتارلىق تېخنىكىلىق مېتاللارغا قويغان چەكلىمىسىنى توختىتىشى يېرىم ئۆتكۈزگۈچ ئۆزەكلىرى ۋە ئېلېكترونلۇق مەھسۇلاتلار بىلەن تەمىنلەشنى قوللايدۇ
خىتاي سودا مىنىستىرلىقىنىڭ باياناتىغا ئاساسلانغاندا، خىتاي يېرىم ئۆتكۈزگۈچنى ئۆز ئىچىگە ئالغان زامانىۋى تېخنىكا ئۈچۈن ھالقىلىق ئەھمىيەتكە ئىگە بولغان گاللىي، گېرمانىي ۋە سۈرمە قاتارلىق مېتاللارنى ئامېرىكىغا ئېكسپورت قىلىشنى نىشان قىلغان چەكلىمىنى توختاتتى.
خىتاي چەكلىمىلىرى ھەم پۇقرالار ۋە ھەم ھەربىي ساھەدە ئىشلىتىلىدىغان «قوش ئىشلىتىلىدىغان» ماللارنىڭ ئېكسپورت قىلىنىشىنى چەكلەشنى ئكز ئىچىگە ئالاتتى.
خىتاي سودا مىنىستىرلىقى يەكشەنبە كۈنى ئېلان قىلغان باياناتىدا، 2024-يىلى دېكابىردا يولغا قويۇلغان بۇ چەكلەشنىڭ ھازىر 2026-يىلى 27-نويابىرغىچە ئەمەلدىن قالدۇرۇلغانلىقىنى بىلدۈردى.
بۇ ئۇقتۇرۇش شى جىنپىڭ بىلەن دونالد ترامپنىڭ 30-ئۆكتەبىر كورېيەدە ئۇچرىشىپ، ئۆزئارا يولغا قويۇلغان بىر قىسىم جازا تەدبىرلىرىنى بىكار قىلىش توغرىسىدا كېلىشىم ھاسىل قىلىشىدىن كېيىن ئېلان قىلىندى.
خىتاي جۈمە كۈنى 9-ئۆكتەبىردە يولغا قويۇلغان باشقا بىر قىسىم ئېكسپورت كونتروللۇقىنىڭمۇ ئەمەلدىن قالدۇرغانلىقىنى ئېلان قىلدى؛ بۇلارنىڭ ئىچىدە مەلۇم تۈردىكى ئاز ئۇچرايدىغان تۇپراق ئېلېمېنتلىرى ۋە لىتىيلىق باتارېيە ماتېرىياللىرىغا قويۇلغان كېڭەيتىلگەن چەكلىمىلەرمۇ بار ئىدى.
بىر مەزگىل ھەر ئىككى تەرەپ يولغا قويغان تاموژنا بېجى نىسبىتى ئۈچ خانىلىق سانغا يېتىپ، دۇنيادىكى ئىككى چوڭ ئىقتىسادىي گەۋدە ئوتتۇرىسىدىكى سودىنى قىيىنلاشتۇرۇپ، يەر شارى تەمىنات زەنجىرىنى تورمۇزلاپ قويغان ئىدى.
سودا ئۇرۇشى جەريانىدا، خىتاي ئەقلىيفونلاردىن تارتىپ ئىلغار ھەربىي تېخنىكىلارغىچە بولغان كەڭ دائىرىدە ئىشلىتىلىدىغان ھالقىلىق مىنېراللار ئۈستىدىكى كونتروللۇقىنى بىر سودىلىشىش قورالى سۈپىتىدە ئىشلىتىشكە ئۇرۇنغان ئىدى.
