جۇمھۇر رەئىس رەجەپ تاييىپ ئەردوغان، نيۇ-يوركتا ئۆتكۈزۈلىدىغان بىرلەشكەن دۆلەتلەر تەشكىلاتى ئومۇمىي كېڭىشىنىڭ يۇقىرى دەرىجىلىكلەر ھەپتىلىكىگە قاتنىشىش ئۈچۈن، يەكشەنبە كۈنىدىن ئېتىبارەن ئامېرىكادا تۆت كۈنلۈك زىيارەتتە بولىدۇ.

ئۇچۇر-ئالاقە ئىدارىسىنىڭ باشلىقى بۇرھانەتتىن دۇران شەنبە كۈنى ئېلان قىلغان باياناتىدا، سەيشەنبە كۈنى يۇقىرى دەرىجىلىك ئومۇمىي مۇزاكىرىلەر باشلىنىدىغانلىقىنى، ئەردوغاننىڭ 81-نۆۋەتلىك ب د ت ئومۇمىي كېڭىشىدە خىتاب قىلىدىغانلىقىنى ئۇقتۇردى.

بۇ يىلقى يىغىن، «ئىشەنچنى قايتىدىن تۇرغۇزۇش، ئۆزگىرىشنى باشقۇرۇش، ھەممە ئۈچۈن نەتىجە يارىتىدىغان بىر ب د ت» دېگەن تېمىدا ئۆتكۈزۈلمەكتە.

ئەردوغاننىڭ زىيارىتى جەريانىدا ب د ت باش كاتىپى ئانتونىيو گۇتېررېس ۋە ھەر قايسى دۆلەتلەرنىڭ دۆلەت شۇنداقلا ھۆكۈمەت باشلىقلىرى بىلەن ئۆزئارا سۆھبەتلەرنى ئۆتكۈزۈشىمۇ مۆلچەرلەنمەكتە.

جۇمھۇر رەئىسنىڭ ئۇنىڭدىن باشقا، ئامېرىكادا ياشاۋاتقان تۈرك پۇقرالىرىنىڭ ۋەكىللىرى، تۈرك-ئامېرىكا سودا ساھەسىدىكىلەر ۋە ئاقىللار ئامبارلىرىنىڭ قاتنىشىشى بىلەن ئۇيۇشتۇرۇلىدىغان تۈرلۈك پائالىيەتلەرگە قاتنىشىشى پىلانلانماقتا.

مەزكۇر زىيارەت، دۇنيا رەھبەرلىرىنىڭ خەلقئارالىق دىپلوماتىك سۆھبەتلەرنىڭ ئاساسلىق سۇپىلىرىدىن بىرى بولغان، ھەر يىلى ئۆتكۈزۈلىدىغان ب د ت ئومۇمىي كېڭىشى يىغىنى ئۈچۈن نيۇ-يوركتا بىر يەرگە جەم بولىدىغان مەزگىلگە توغرا كەلمەكتە.