تۈركىيە جۇمھۇرىيىتى ئەمگەك ۋە ئىجتىمائىي كاپالەت ئىشلىرى مىنىستىرى ۋەدات ئىشىقخان، تۈرلۈك زىيارەتلەردە بولۇش ئۈچۈن بارغان ئىتالىيەنىڭ پايتەختى رىمدا، ئىتالىيە ئەمگەك ۋە ئىجتىمائىي سىياسەتلەر مىنىستىرى مارىنا ئېلۋىرا كالدېرونې بىلەن بىر يەرگە جەم بولدى. سۆھبەتتە ئىككى دۆلەت ئوتتۇرىسىدىكى ئەمگەك ھاياتى، ئىشقا ئورۇنلاشتۇرۇش، كەسپىي تەربىيەلەش ۋە ئىجتىمائىي كاپالەت ساھەلىرىدىكى ھەمكارلىقنى تەرەققىي قىلدۇرۇش مەسىلىلىرى ئەتراپلىق مۇزاكىرە قىلىندى.
مىنىستىر ئىشىقخان، تۈركىيەنىڭ ناتو ئىتتىپاقدىشى ۋە ئىستراتېگىيەلىك شېرىكى ئىتالىيە بىلەن بولغان مۇناسىۋەتلەرنىڭ ئۆزئارا ھۆرمەت ۋە ئورتاق مەنپەئەت يەتكۈزۈش ئاساسىدا ئىجابىي داۋاملىشىۋاتقانلىقىدىن خۇرسەن ئىكەنلىكىنى تەكىتلەپ مۇنداق دېدى:
«جۇمھۇر رەئىسىمىز رەجەپ تاييىپ ئەردوغان بىلەن ئىتالىيە باش مىنىستىرى جورجىيا مېلونى ئوتتۇرىسىدىكى قويۇق دىيالوگ ئىككى دۆلەت ھەمكارلىقىنى كۈچەيتىشكە مۇھىم تۆھپە قوشماقتا. ئالدىنقى يىلى ئۆتكۈزۈلگەن باشلىقلار يىغىنىدا بېكىتىلگەن ئىككى تەرەپلىك سودا سوممىسىنى 40 مىليارد دوللارغا يەتكۈزۈش نىشانى ئىنتايىن مۇھىم بىر ئىلگىرىلەشتۇر. بولۇپمۇ مۇداپىئە سانائىتى باشلىق تۈرلۈك ساھەلەردىكى شېرىكلىك مۇناسىۋەتلىرىمىز ئىقتىسادىي ئالاقىمىزنىڭ تېخىمۇ چوڭقۇرلىشىۋاتقانلىقىنى كۆرسىتىپ بەرمەكتە.»
ئىشىقخان يەنە، كەسپىي تەربىيەلەش ۋە ئىجتىمائىي كاپالەت سىستېمىسىنىڭ سىجىللىقى مەسىلىلىرىدە تەجرىبە ئالماشتۇرۇشنىڭ ھەر ئىككى دۆلەتكە پايدىلىق بولىدىغانلىقىنى تەكىتلىدى. ئۇ ئىتالىيەدىكى تۈرك جەمئىيىتى ۋە تۈركىيەدىكى ئىتالىيە پۇقرالىرىنىڭ ئەمگەك ھاياتىدا يولۇققان مەسىلىلىرىنى ھەل قىلىشقا ئالاھىدە ئەھمىيەت بېرىدىغانلىقىنى بىلدۈردى. كۆرۈشۈشتىن كېيىن، ئىككى مىنىستىر ھەمكارلىق كېلىشىم لايىھەسىگە ئىمزا قويدى.
مىنىستىر ۋەدات ئىشىقخان ئاممىۋى ئورتاقلىشىش تور بېتى NSosyal سەھىپىسىدە ئېلان قىلغان باياناتىدا مۇنداق دېدى:
«تۈركىيە-ئىتالىيە مۇناسىۋەتلىرىگە تۆھپە قوشىدىغان بۇ كېلىشىم ۋە ئالدىمىزدىكى مۇساپىدە قۇرۇلىدىغان ئورتاق خىزمەت گۇرۇپپىسى ئارقىلىق ئىككى تەرەپلىك دىيالوگىمىزنىڭ تېخىمۇ كۈچىيىدىغانلىقىغا ئىشىنىمىز. بىز ئىجتىمائىي كاپالەت ۋە ئەمگەك ساھەسىدە ئۇچۇر ھەم تەجرىبە ئالماشتۇرۇشنى قېلىپلاشتۇرۇش ئارقىلىق، پۇقرالىرىمىزنىڭ ھوقۇقىنى قوغداش پائالىيەتلىرىمىزنى ئۈزلۈكسىز داۋاملاشتۇرىمىز.»
