فىرانسىيە پىرېزىدېنتى ئېممانۇئېل ماكرون، ئۇل ئەسلىھەلىرى رۇسىيە تەرىپىدىن نىشان قىلىنغان ئۇكرائىنانى ھاۋا مۇداپىئە سىستېمىلىرى بىلەن تەمىنلەش توغرىسىدا كېلىشىم ئىمزالىغانلىقلىرىنى ئۇقتۇردى.

ئېممانۇئېل ماكرون ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، بىرلەشكەن دۆلەتلەر تەشكىلاتى ئومۇمىي كېڭىشىنىڭ 81-نۆۋەتلىك يىغىنى جەريانىدا ئۇكرائىنا پىرېزىدېنتى ۋولودىمىر زېلېنسكىي بىلەن «قويۇق سۆھبەت» ئۆتكۈزگەنلىكىنى ئەسكەرتتى.

رۇسىيەنىڭ ئۇكرائىنا ئېنېرگىيە ئۇل ئەسلىھەلىرىگە قىلغان ھۇجۇملىرىنىڭ مىليونلىغان ئۇكرائىنالىقنىڭ توك ۋە ئىسسىقلىق تەمىناتىدىن مەھرۇم قېلىشىغا سەۋەب بولغانلىقىنى ئەسكەرتكەن ماكرون، ئۇكرائىنانىڭ قىش پەسلىدىن ئۆتۈۋېلىشى ئۈچۈن فىرانسىيەنىڭ ھەمىشە ئۇلارنىڭ يېنىدا بولىدىغانلىقىنى تىلغا ئالدى. ماكرون يەنە زېلېنسكىي بىلەن ئۇكرائىناغا رادار ۋە ھاۋا مۇداپىئە سىستېمىسى يەتكۈزۈپ بېرىشكە ئائىت كېلىشىم ئىمزالىغانلىقىنىمۇ سۆزلىرىگە ئىلاۋە قىلدى.

ئۇكرائىنانى قوللاش مەسىلىسىنى ئامېرىكا پىرېزىدېنتى دونالد ترامپ بىلەنمۇ مۇزاكىرە قىلغانلىقىنى بايان قىلغان ماكرون، ئېنېرگىيە بىخەتەرلىكى ئۈچۈن قارادېڭىزدا تىنچلىق ۋە مۇقىملىقنى كاپالەتكە ئىگە قىلىشقا چاقىرىق قىلدى.

بىرلەشكەن دۆلەتلەر تەشكىلاتى ئومۇمىي كېڭىشى يىغىنىغا قاتنىشىش ئۈچۈن نىيۇ يوركتا تۇرۇۋاتقان فىرانسىيە پىرېزىدېنتى ماكرون، ئامېرىكا پىرېزىدېنتى ترامپ بىلەن ئېلىپ بېرىلغان كۆرۈشۈشىنىڭ ئىنتايىن ئۈنۈملۈك بولغانلىقىنى سۆزلىرىگە ئىلاۋە قىلدى.