كارل سكاۋ نيۇ-يوركتىكى ب د ت باش ئىشتابىدا ئۆتكۈزۈلگەن كۈندىلىك ئاخبارات ئېلان قىلىش يىغىنىدا ئوتتۇرا شەرقتىكى مەسىلىلەرگە ئالاقىدار يېڭى ئۇچۇرلارنى ھەمبەھرىلىدى.
غەززەدىكى لاگېرلاردا ياشاۋاتقان پەلەستىنلىكلەرنىڭ «كۈنىگە پەقەت بىر ۋاقلا ئىسسىق تاماق يېيەلەيدىغانلىقىنى» ۋە تاماق ئېتىش ئۈچۈن گازمۇ تاپالمايۋاتقانلىقىنى ئېيتقان سكاۋ، يۈز بېرىۋاتقان مەبلەغ كرىزىسىغا دىققەتلەرنى تارتتى.
سكاۋ مۇنداق دېدى: «بۇنىڭ بىردىنبىر سەۋەبى، قولىمىزدىكى مەبلەغنىڭ ئازىيىپ كەتكەنلىكىدۇر. يەنى نۆۋەتتىكى ياردەم سەۋىيەمىزنى ساقلاپ قېلىش ئۈچۈن يېتەرلىك مەنبەگە ئىگە ئەمەسمىز. ئەڭ ئېھتىياجلىق كىشىلەرنى ئالدىنقى ئورۇنغا قويۇش ئۈچۈن قولىمىزدىن كېلىشىچە تىرىشىمىز. بۇ ھەرگىزمۇ ئاسان جەريان ئەمەس.»
غەززەلىكلەرنىڭ پىسخىك ئەھۋالىنى تىلغا ئالغان سكاۋ يەنە مۇنداق دېدى: «كىشىلەر ئۈمىدىنى يوقىتىشقا باشلىدى. ئۇرۇش توختىتىش باشلانغاندا، ھەتتا يانۋار ۋە فېۋرال ئايلىرىدا ۋەزىيەتنىڭ ياخشىلىنىدىغانلىقىغا بولغان بىر ئۈمىد بار ئىدى. كۆرۈنەرلىك بىر ئۆزگىرىش بولىدىغانلىقىغا، كىشىلەرنىڭ ھاياتىنى قايتىدىن قۇرۇپ چىقالايدىغانلىقىغا بولغان ئىشەنچ مەۋجۇت ئىدى. ئەمما ھازىر بىر توختاپ قېلىش، ھايات گويا توڭلىتىپ قويۇلغاندەك بىر تۇيغۇ ھۆكۈم سۈرمەكتە.»
كارل سكاۋ ئىسرائىلىيەنىڭ ھۇجۇملىرى ۋە ئىنسانپەرۋەرلىك ياردەم بۇيۇملىرىنىڭ كىرىشىگە قويۇلغان چەكلىمىلەر داۋاملىشىۋاتقان غەززەدە ئۆزى سۆزلەشكەن نۇرغۇن كىشىنىڭ «ئۇنتۇلۇپ قالغاندەك ھېس قىلىدىغانلىقى» غا تەرەپكە دىققەتلەرنى تارتتى.
غەززە ئۈچۈن تېخىمۇ كۆپ تىرىشچانلىق كۆرسىتىدىغان ۋاقىتنىڭ كەلگەنلىكىنى ئېيتقان سكاۋ: «قولغا كەلتۈرگەن نەتىجىلىرىمىزنى قوغدىشىمىز، ئاچارچىلىقنىڭ ئالدىنى ئېلىش پىروگراممىلىرىنى داۋاملاشتۇرۇشىمىز ۋە ھەتتا ئۇنىڭدىنمۇ ھالقىپ ئۆتۈشىمىز كېرەك» دېدى.
