رۇسىيەنىڭ ۋولگوگراد شەھىرىدە ئۇكرائىنانىڭ ئۇچقۇچىسىز ھاۋا ئاپپاراتلىرى (ئۇھئا) ئارقىلىق ئېلىپ بارغان ھۇجۇمىدىن كېيىن بىر سانائەت رايونىدا ئوت ئاپىتى يۈز بەردى.
ۋولگوگراد رايونىنىڭ ۋالىيسى ئاندرېي بوچاروۋ يازما باياناتىدا، رۇسىيە ھاۋا مۇداپىئە سىستېمىلىرىنىڭ رايونغا قارىتىلغان قويۇق ئۇچقۇچىسىز ھاۋا ئاپپاراتلىرى ھۇجۇملىرىغا قايتۇرما زەربە بېرىشكە تىرىشقانلىقىنى تەكىتلەپ مۇنداق دېدى:
«ئۇچقۇچىسىز ھاۋا ئاپپاراتلىرى پارچىلىرىنىڭ چۈشۈپ كېتىشى نەتىجىسىدە ۋولگوگرادنىڭ جەنۇبىدىكى سانائەت رايونىغا جايلاشقان بىر شىركەت ۋە ئۇنىڭ ئەتراپىدا ئوت ئاپىتى يۈز بەردى.»
ئوتنى ئۆچۈرۈش خىزمەتلىرىنىڭ جىددىي قانات يايدۇرۇلغانلىقىنى تەكىتلىگەن بوچاروۋ، ھۇجۇمدا 4 كىشىنىڭ ھاياتىدىن ئايرىلغانلىقىنى، 2 كىشىنىڭ يارىلانغانلىقىنى ئۇقتۇردى.
ئاممىۋى تاراتقۇلاردىكى خەۋەرلەردە ئوت ئاپىتىنىڭ رۇسىيەنىڭ نېفىت ماگناتى «لۇكويىل» غا تەۋە ۋولگوگراد نېفىت ئايرىش زاۋۇتىدا يۈز بەرگەنلىكى ئىلگىرى سۈرۈلدى.
رۇسىيەنىڭ ئەڭ چوڭ نېفىت ئايرىش زاۋۇتلىرىنىڭ بىرى بولغان مەزكۇر قۇرۇلۇش، يىلىغا تەخمىنەن 14 مىليون 800 مىڭ توننا نېفىت بىر تەرەپ قىلىش ئىقتىدارىغا ئىگە.
ئۇكرائىناغا تەۋە 1198 ئۇچقۇچىسىز ئاپپاراتى ئېتىپ چۈشۈرۈلدى
رۇسىيە دۆلەت مۇداپىئە مىنىستىرلىقىنىڭ باياناتىدا، يېرىم كېچىدە ئۇكرائىنانىڭ 1198 دانە ئۇچقۇچىسىز ھاۋا ئاپپاراتىنىڭ ھاۋا مۇداپىئە سىستېمىلىرى ئارقىلىق ئېتىپ چۈشۈرۈلگەنلىكى ئۇقتۇرۇلدى.
باياناتتا بۇ ئاپپاراتلارنىڭ موسكۋانىمۇ ئۆز ئىچىگە ئالغان ھەرقايسى رايونلار ئۈستىدە يوقىتىلغانلىقى قەيت قىلىندى.
