برۇنو رودرىگېز باش ئىشتابى ئامېرىكادىكى X شىركىتىنىڭ ئىجتىمائىي تاراتقۇ سۇپىسىدا تارقاتقان يازمىسىدا، ئارال دۆلىتى ھۇجۇمغا ئۇچرىغان تەقدىردە يۈز بېرىش ئېھتىمالى بولغان ئەھۋاللارغا دىققەت تارتتى.

كۇبا تاشقى ئىشلار مىنىستىرى: «ئامېرىكانىڭ كۇباغا قارىتىدىغان ھەرقانداق بىر ھەربىي ھۇجۇمى، ھەقىقىي مەنىدىكى بىر ئىنسانىي پاجىئەگە ۋە قان كۆلىگە سەۋەب بولىدۇ. بۇ، پەقەت پەرزەنتلىرىنى ۋە يېقىنلىرىنى ئۇرۇشلارغا ئەۋەتمەيدىغان سىياسەتچىلەر قىمار ئوينايدىغان بىر خىل ئەھۋال بولۇپ، بۇ يولدا ھەم كۇبا، ھەم ئامېرىكا پۇقرالىرى ھاياتىدىن ئايرىلىدۇ» دېگەنلەرنى قەيت قىلدى.

ئامېرىكانىڭ كۇباغا ھۇجۇم قىلىش ئۈچۈن ھېچقانداق ئاساسى يوقلۇقىنى تەكىتلىگەن رودرىگېز: «ئامېرىكاغا ئوخشاش بىر دەرىجىدىن تاشقىرى كۈچنىڭ، پەقەت ئاز ساندىكى كىشىلەرنىڭ سىياسىي تۈزۈمىنى ياكى ھۆكۈمىتىنى ئۆزگەرتىش ئارزۇسى ئۈچۈن، ئۆزىگە ھېچقانداق تەھدىت شەكىللەندۈرمەيدىغان كىچىك بىر ئارالغا ھەربىي ھۇجۇم قىلىشى ئۈچۈن ئەڭ كىچىك بىر سەۋەب، ھەتتا ئەڭ كىچىك بىر باھانىسىمۇ يوق» دېدى.

ئامېرىكا پىرىزېدېنتى دونالد ترامپ ئېلان قىلغان باياناتىدا: «كۇبا بىزدىن ياردەم تەلەپ قىلىۋاتىدۇ ۋە بىزمۇ (ئۇلار بىلەن) سۆزلىشىمىز» دېگەنىدى.

ۋەزىپە ئۆتەش مۇددىتى توشۇشتىن بۇرۇن «ئەركىن ھاۋانا»نى زىيارەت قىلىشنى خالايدىغانلىقىنى بىلدۈرگەن ترامپ، بىر نەچچە قېتىم «ئىراندىن كېيىن كۇبا مەسىلىسى بىلەن شۇغۇللىنىدىغانلىقى»نى ئېيتقانىدى.