تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان چارشەنبە كۈنى قىرغىزىستان زىيارىتىدىن قايتىش يولىدا ئايروپىلاندا مۇخبىرلارنىڭ سوئاللىرىغا جاۋاب بەردى. ئەردوغان تۈركىيەنىڭ شاڭخەي ھەمكارلىق تەشكىلاتىغا ئەزا بولۇش تىرىشچانلىقىنىڭ غەربتىن يۈز ئۆرۈگەنلىك دېگەن مەنىنى بىلدۈرمەيدىغانلىقىنى ئەسكەرتىپ: «نىشانىمىز 360 گىرادۇسلۇق نەزەر بىلەن ئۆز تەسىر كۈچىمىزنى زوراتىشتۇر» دېدى.
رۇسىيە-ئۇكرائىنا ئۇرۇشى توغرىسىدا توختالغان ئەردوغان، ئۆزىنىڭ ۋە رۇسىيە پىرېزىدېنتى پۇتىننىڭ توقۇنۇشنىڭ تېزراق تىنچ يول بىلەن ئاخىرلىشىشىنى ئۈمىد قىلىدىغانلىقىنى بىلدۈردى. شۇنداقلا قارادېڭىزدىكى پۇقراۋى دېڭىز قاتنىشى ۋە سودا پائالىيەتلىرىنىڭ خەۋپسىزلىكىنى قوغداشنىڭ مۇھىملىقىنى تەكىتلىدى. جۇمھۇر رەئىس يەنە، ئافرىقادا قايتىدىن ئاشلىق كىرىزىسىنىڭ ئوتتۇرىغا چىقىۋاتقانلىقى توغرىسىدا ئاگاھلاندۇرۇپ، بۇ مەسىلىنى ھەل قىلىش ئۈچۈن جىددىي تەشەببۇس كېرەكلىكىنى ئېيتتى.
مۇداپىئە سانائىتى ساھەسىدە، تۈركىيەنىڭ «F-35» ئۇرۇش ئايروپىلانى پىروگراممىسىغا قايتا كىرىش ئۈچۈن سۆھبەتلەرنى داۋاملاشتۇرۇۋاتقانلىقىنى، ئەمما بۇ جەرياندا يەرلىك ئۇرۇش ئايروپىلانى «قاغان» (KAAN) ۋە تۈركىيەنىڭ ھاۋا مۇداپىئە سىستېمىلىرىنى تەرەققىي قىلدۇرۇشتىن ھەرگىز ۋاز كەچمەيدىغانلىقىنى بىلدۈردى. ئۇ يەنە تۈركىيە، پاكىستان ۋە سەئۇدى ئەرەبىستان ئوتتۇرىسىدىكى «مەككە مۇداپىئە ئىتتىپاقى» نىڭ رايوننىڭ مۇقىملىقى ئۈچۈن خىزمەت قىلىدىغانلىقىنى تىلغا ئالدى.
ئەردوغان گىرېتسىيەنى ھەربىيسىز سالاھىيەتتىكى ئاراللارنى قوراللاندۇرۇشتەك خاتا يولدىن قايتىشقا چاقىردى. دۆلەت ئىچىدىكى «تېررورسىز تۈركىيە» مۇساپىسى ھەققىدە توختىلىپ، تېررورلۇق تەشكىلاتى پ ك ك نىڭ قورال تاشلىشى ۋە تارقىتىۋېتىلىشىنىڭ زۆرۈرلۈكىنى، دۆلەتنىڭ بىرلىكىنى قوغدايدىغان «بۈيۈك تۈركىيە كېلىشىمى» ئاساسىدا ئىلگىرىلەيدىغانلىقلىرىنى تەكىتلىدى.
سۈرىيە مەسىلىسىدە، ي پ گ يېتەكچىلىكىدىكى سۈرىيە دېموكراتىك كۈچلىرىنىڭ (SDG) تارقىتىۋېتىلىشىنى مۇھىم بىر بۇرۇلۇش دەپ ئاتاپ: «بۇ قەدەم پەقەت سۈرىيە ئۈچۈنلا ئەمەس، بەلكى پۈتۈن رايون ئۈچۈن يېڭى بىر دەۋرنىڭ دەرۋازىسىنى ئاچىدۇ. تېررورىزم خاتىرىسى ئەمدى تاقىلىشى، قورال ۋە زوراۋانلىق دەۋرى ئاخىرلىشىشى كېرەك» دېدى.
