ئىران ئامېرىكا ئەسكەرلىرىنىڭ قولغا چۈشۈرۈلگەنلىكىنى ئىلگىرى سۈردى، ئامېرىكا بۇ دەۋالارنى رەت قىلدى

ئىراننىڭ يۇقىرى دەرىجىلىك خەۋپسىزلىك ئەمەلدارلىرىدىن ئەلى لارىجانى، ئامېرىكا ئەسكەرلىرىنىڭ قولغا چۈشۈرۈلگەنلىكىنى ئىلگىرى سۈرۈپ، ۋاشىنگتوننى بۇ ۋەقەنى يوشۇرۇشقا ئۇرۇنۇش بىلەن ئەيبلىدى.

لارىجانى شەنبە كۈنى X سۇپىسىدا ھەمبەھىرلىگەن ئۇچۇرىدا: «ماڭا بىر قانچە ئامېرىكا ئەسكىرىنىڭ ئەسىرگە ئېلىنغانلىقى خەۋەر قىلىندى. ئەمما ئامېرىكىلىقلار ئۇلارنىڭ توقۇنۇشتا ئۆلگەنلىكىنى دەۋا قىلماقتا» دېگەن سۆزلەرنى قوللاندى.

ئۇ يەنە: «ئۇلارنىڭ بىھۇدە تىرىشچانلىقلىرىغا قارىماي، ھەقىقەتنى ئۇزۇنغىچە يوشۇرۇپ قالالمايدۇ» دەپ ئەسكەرتتى.

ئامېرىكا ئارمىيەسى بولسا بۇ دەۋانى تېزدىن رەت قىلىپ، ھېچقانداق ئامېرىكا ئەسكىرىنىڭ ئەسىرگە ئېلىنمىغانلىقىنى ئىلگىرى سۈردى.

ئامېرىكا مەركىزىي قوماندانلىق شتابى (CENTCOM) نىڭ باياناتچىسى «Al Jazeera» قانىلىغا بەرگەن باياناتىدا، ئىراننىڭ دەۋالىرىنىڭ توغرا ئەمەسلىكىنى ئېيتتى.

باياناتچى: «ئىران ھاكىمىيىتىنىڭ ئامېرىكا ئەسكەرلىرىنى ئەسىرگە ئالغانلىقى ھەققىدىكى دەۋالىرى، ھاكىمىيەتنىڭ يالغانچىلىق ۋە ئالدامچىلىقلىرىنىڭ يەنە بىر مىسالىدۇر» دېدى.

28-فېۋرال ئامېرىكا ۋە ئىسرائىلىيەنىڭ ئىرانغا قارىتا بىرلىكتە ھاۋا ھۇجۇمىنى باشلىشىدىن كېيىن، رايوندىكى جىددىي ۋەزىيەت تېز سۈرئەتتە كۈچەيدى. ھۇجۇملاردا ئالىي رەھبەر ئەلى خامىنىي، 150 دىن ئارتۇق قىز ئوقۇغۇچى ۋە يۇقىرى دەرىجىلىك ھەربىي ئەمەلدارلارنى ئۆز ئىچىگە ئالغان مىڭدىن ئارتۇق ئادەم ھاياتىدىن ئايرىلدى.

بۇ ئۇرۇش رايوندا كەڭ كۆلەملىك مۇقىمسىزلىقنى كەلتۈرۈپ چىقارغان بولسا، تېھرانمۇ رايون مىقياسىدا ئامېرىكا بىلەن ئالاقىسى بار نىشانلارغا قارىتا ئۆچ ئېلىش ھۇجۇملىرىنى ئېلىپ باردى.