ئامېرىكا ئىچكى بىخەتەرلىك ئىشلىرى مىنىستىرى كىرىستى نوئېم پىرېزىدېنت دونالد ترامپ مۇشۇ يىلنىڭ باشلىرىدا ۋەزىپىگە ئولتۇرغاندىن بۇيان دۆلەت مىقياسىدا 480 مىڭدىن ئارتۇق قانۇنسىز كۆچمەننىڭ قولغا ئېلىنغانلىقىنى جاكارلىدى.
نوئېم دۈشەنبە كۈنى فىلورىدا ئىشتاتىدا ئۆتكۈزۈلگەن مۇخبىرلارنى كۈتۈۋېلىش يىغىنىدا بەرگەن باياناتىدا مۇنداق دېدى:
«يانۋار ئېيىنىڭ باشلىرىدىن بۇيان ئىچكى بىخەتەرلىك مىنىستىرلىقى 480 مىڭدىن ئارتۇق قانۇنسىز جىنايەتچى كۆچمەننى قولغا ئالدى. ئۇلارنىڭ %70 ى جىنايى قىلمىشلارنى سادىر قىلىش بىلەن ئەيىبلەنمەكتە ياكى بۇ جىنايى قىلمىشلار بىلەن ئەيىبلىنىپ سوتلانماقتا.
دۆلەت مىقياسىدا، جەمئىيەتلەرنى تېخىمۇ بىخەتەر ھالغا كەلتۈرۈۋاتىمىز، بۇنىڭ بىلەن ئائىلىلەر پاراۋانلىق ئىچىدە خاتىرجەم ياشىيالايدۇ ۋە بۇ دۆلەتنىڭ قۇرۇلۇشىنىڭ كاپالىتى بولغان ئەركىنلىكتىن بەھرىمەن بولالايدۇ.»
ئالدىنقى ئايدا، مىنىستىرلىق 20 – يانۋاردىن بۇيان 2 مىليون قانۇنسىز كۆچمەننىڭ ئامېرىكادىن ئايرىلغانلىقىنى ئۇقتۇرغان ئىدى. بۇ ھەقتە ئېلان قىلىنغان ئۇقتۇرۇشقا ئاساسلانغاندا، بۇلاردىن تەخمىنەن 1 مىليون 600 مىڭى ئۆز ئىختىيارلىقى ۋە ئۆز ئىرادىسى بىلەن دۆلەتتىن ئايرىلغان، 400 مىڭى بولسا چېگرادىن قوغلاپ چىقىرىلغان.
«رېكورت»
يەنە بىر تەرەپتىن، دونالد ترامپ دۈشەنبە كۈنى ئېلان قىلغان باياناتىدا، ئۆزىنىڭ ھاكىمىيەت يۈرگۈزگەن مەزگىلىدە يولغا قويۇلغان «رېكورت ياراتقان» قانۇن ئىجرا قىلىش پائالىيەتلىرىنى ماختاپ، فېدېراتسىيە تەكشۈرۈش ئىدارىسى (FBI) نىڭ زوراۋانلىق جىنايەتلىرى، زەھەرلىك چېكىملىك ئەتكەسچىلىكى ۋە بالىلارنى قوغداش خىزمەتلىرىگە ئائىت يېڭى سانلىق مەلۇماتلىرىنى مىسال كەلتۈردى.
ترامپ ئاممىۋى ئورتاقلىشىش تور بېتى Truth Social سەھىپىسىدە ئېلان قىلغان باياناتىدا مۇنداق دېدى:
«مېنىڭ ھۆكۈمىتىم دەۋرىدە فېدېراتسىيە تەكشۈرۈش ئىدارىسى ناھايىتى ياخشى ئىشلارنى قىلىۋاتىدۇ. 20 – يانۋاردىن بۇيان 28 مىڭدىن ئارتۇق زوراۋان جىنايەتچى قولغا ئېلىندى (رېكورت!). 6 مىڭدىن ئارتۇق قانۇنسىز قورال - ياراغ قولغا چۈشۈرۈلدى، 1700 دىن ئارتۇق بالىلارنى خورلاش شايكىلىرى ۋە 300 ئادەم ئەتكەسچىسى كوچىلاردىن تازىلاندى.»
ترامپ يەنە 5000 بالىنىڭ قۇتقۇزۇۋېلىنغانلىقىنى ۋە قانۇن ئىجرا قىلغۇچىلارنىڭ 1900 كىلوگىرام فېنتانىم (زەھەرلىك چېكىملىك ماددىسى) نى قولغا چۈشۈرگەنلىكىنى، بۇنىڭ «125 مىليون ئادەمنى ئۆلتۈرۈشكە يېتەرلىك مىقدار» ئىكەنلىكىنى ئەسكەرتىپ مۇنداق دېدى:
«بىز ئامېرىكاغا قانۇن ۋە تەرتىپنى قايتۇرۇپ كېلىمىز. كاش، دان، ئاندىرىيو ۋە فېدېراتسىيە تەكشۈرۈش ئىدارىسىدىكى بارلىق ئەر - ئايال خىزمەتچى خادىملار ناھايىتى ياخشى ئىشلارنى قىلىۋاتىدۇ، بىز ئامېرىكانى قايتىدىن بىخەتەر قىلىمىز!»
