«راگاسا» ھازىر جەنۇبىي خىتاي دېڭىزىدا ئىلگىرىلەۋاتقان بولۇپ، ئۇ ئىلگىرى فىلىپپىننىڭ بىر قىسىم جايلىرىغا ھۇجۇم قىلغان، بوراندا بىر ئادەم قازا قىلغان ئىدى.
خىتاي دەرىجىدىن تاشقىرى «راگاسا» ناملىق تەيفېڭ بورىنىنىڭ دۆلەتنىڭ جەنۇبىغا يېقىنلىشىشىغا ئەگىشىپ، كەم دېگەندە 10 شەھەردە مەكتەپ ۋە خىزمەت ئورۇنلىرىنى تاقاشنى بۇيرۇدى.
بۇ تەدبىرلەر ئون مىليونلىغان كىشىگە تەسىر كۆرسىتىپلا قالماي، يەنە خىتاينىڭ ئىشلەپچىقىرىش مەركەزلىرى جايلاشقان كەڭ رايونلاردىكى مىڭلىغان زاۋۇتنىڭ پائالىيىتىنىمۇ ئۈزۈپ قويىدۇ.
ئۆلكىلىك جىددىي ئىشلارنى بىر تەرەپ قىلىش ئىدارىسى سەيشەنبە كۈنى ئەتىگەندە ئېلان قىلغان باياناتىدا، «راگاسا»نىڭ 24 سائەت ئىچىدە گۇاڭدۇڭنىڭ ئوتتۇرا ۋە غەربىي دېڭىز قىرغىقى رايونلىرىغا يېتىپ كېلىشىنىڭ مۆلچەرلىنىۋاتقانلىقىنى بىلدۈردى. باياناتتا: «مۇھىم رايونلار قەتئىي تەدبىر قوللىنىپ، خەلقنىڭ ھاياتى ۋە مال-مۈلكىنى تولۇق قوغداپ، ئاپەت زىيىنىنى ئەڭ تۆۋەن چەككە چۈشۈرۈشى كېرەك» دېيىلدى.
«راگاسا» يېقىنلاشماقتا ۋە گۇاڭدۇڭ بوران-چاپقۇن ئۈچۈن ئەڭ يۇقىرى دەرىجىلىك جىددىي تاقابىل تۇرۇش چارىسىنى يولغا قويدى. خوڭ كوڭدىكى ھاۋارايى ئىدارىسىنىڭ خەۋىرىگە قارىغاندا، تەيفېڭ بورىنىنىڭ سائەتلىك سۈرئىتى 230 كىلومېتىر (140 مىل) غا يېتىدىكەن. تېخنولوگىيە مەركىزى شېنجېن 400 مىڭ كىشىنى تارقاقلاشتۇرۇشنى بۇيرۇدى، شەھەرلىك جىددىي ئىشلارنى بىر تەرەپ قىلىش ئورگانلىرى «قاتتىق شامال، يامغۇر، دېڭىز تاشقىنى ۋە كەلكۈن» دىن ئاگاھلاندۇردى.
باياناتتا: «جىددىي قۇتقۇزۇش خادىملىرى ۋە خەلقنىڭ تۇرمۇشىنى كاپالەتكە ئىگە قىلىدىغانلاردىن باشقىلار، خالىغانچە سىرتقا چىقماڭ» دېيىلىپ، چۈشتىن كېيىن خىزمەت ۋە بازارلارنىڭ تاقىلىدىغانلىقى قوشۇمچە قىلىندى.
جۇخەي، دۇڭگۇەن ۋە فوشەن قاتارلىق باشقا چوڭ شەھەرلەرمۇ پائالىيەتلەرنى توختىتىش تەدبىرلىرىنى يولغا قويغانلارنىڭ قاتارىدىن ئورۇن ئالدى. فوشەن شەھەرلىك جىددىي ئىشلار مەركىزى باياناتىدا: «قاتتىق شامال ۋە قارا يامغۇر... شەھىرىمىزگە ئېغىر تەسىر كۆرسىتىدۇ ۋە ھالقىلىق مۇداپىئە ھالىتىنى شەكىللەندۈرىدۇ» دېدى.
«راگاسا» ھازىر جەنۇبىي خىتاي دېڭىزىدا ئىلگىرىلەۋاتقان بولۇپ، ئۇ ئىلگىرى فىلىپپىننىڭ بىر قىسىم جايلىرىغا ھۇجۇم قىلغان، بوران سەۋەبىدىن بىر ئادەم قازا قىلغان ئىدى. خىتاي دۆلەتلىك تېلېۋىزىيە ئىستانسىسى CCTV نىڭ خەۋىرىدە، سۇ يولىنىڭ شىمالىي قىسمى، تەيۋەن بوغۇزىنىڭ جەنۇبى، باشى قانىلى ۋە گۇاڭدۇڭنىڭ دېڭىز قىرغىقى ئەتراپىدا پائالىيەت ئېلىپ بېرىۋاتقان پاراخوتلارنىڭ «بىخەتەرلىككە دىققەت قىلىشى كېرەكلىكى» نى ئېيتتى.
مۇتەخەسسىلەر ئىنسانلار كەلتۈرۈپ چىقارغان كېلىمات ئۆزگىرىشىنىڭ يەر شارىنى ئىسسىتىشىغا ئەگىشىپ، بوران-چاپقۇنلارنىڭ تېخىمۇ كۈچلۈك ۋە دائىم يۈز بېرىدىغانلىقى ھەققىدە ئومۇميۈزلۈك ئورتاق تونۇشقا ئىگە.
