ئافغانىستاندا يېقىنقى ئۈچ كۈن ئىچىدە تەسىر كۆرسەتكەن قار بېسىش ۋە قاتتىق يامغۇر سەۋەبىدىن 61 كىشى ھاياتىدىن ئايرىلدى. ئافغانىستان دۆلەتلىك ئاپەتكە تاقابىل تۇرۇش ئىدارىسى (ANDMA) شەنبە كۈنى ئېلان قىلغان باياناتىدا، ئادەم ئۆلۈش ۋەقەلىرىنىڭ چارشەنبە بىلەن جۈمە كۈنلىرى ئارىسىدا، ئاساسلىقى دۆلەتنىڭ ئوتتۇرا ۋە شىمالىي ۋىلايەتلىرىدە يۈز بەرگەنلىكىنى ئۇقتۇردى.
ئافغانىستان دۆلەتلىك ئاپەتكە تاقابىل تۇرۇش ئىدارىسى (ANDMA) ئېلان قىلغان خەرىتىگە ئاساسلانغاندا، دەسلەپكى بېكىتىش خىزمەتلىرى دائىرىسىدە 110 كىشىنىڭ يارىلانغانلىقى، 458 ئۆي-ماكاننىڭ بولسا قىسمەن ياكى پۈتۈنلەي ۋەيران بولغانلىقى بىلدۈرۈلدى. مەزكۇر ئىدارە بۇ رەقەملەرنىڭ «دەسلەپكى زىيان ۋە تالافەت بېكىتىش نەتىجىسى» ئىكەنلىكىنى ئەسكەرتتى.
ئافغانىستان دۆلەتلىك ئاپەتكە تاقابىل تۇرۇش ئىدارىسى (ANDMA) نىڭ بىر باياناتچىسى سىنلىق ئۇچۇرىدا، جەمئىي 360 ئائىلىنىڭ ئاپەتنىڭ تەسىرىگە ئۇچرىغانلىقىنى ئېيتىپ، خەلقتىن زۆرۈر بولمىغان ئەھۋالدا قارلىق يوللاردا سەپەر قىلماسلىقنى تەلەپ قىلدى.
دۆلەتنىڭ ئاساسلىق قاتناش تومۇرلىرىدىن بىرى بولغان سالاڭ تاشيولىنىڭ قاتناشقا تاقالغانلىقى پەرۋان ۋىلايىتىنىڭ دائىرىلىرى تەرىپىدىن ئاشكارىلاندى.
يەنە بىر تەرەپتىن، دۆلەتنىڭ ئوتتۇرا قىسمىغا جايلاشقان باميان ۋىلايىتىدە، تاغ ئېغىزىدا قاپسىلىپ قالغان يولۇچىلارغا يېمەكلىك ياردىمى تارقىتىلغانلىقى خەۋەر قىلىندى.
