ئاۋسترالىيە دۈشەنبە كۈنى رەسمىي بايانات ئېلان قىلىپ، كانادا بىلەن كۆزىتىش رادار تېخنىكىسى سېتىۋېلىش ئۈچۈن 2.5 مىليارد ئاۋسترالىيە دوللىرى (1.75 مىليارد ئامېرىكا دوللىرى) قىممىتىدىكى كېلىشىم تۈزگەنلىكىنى جاكارلىدى.

ئاۋسترالىيە مۇداپىئە مىنىستىرى رىچارد مارلېس بۇ كېلىشىمنى كانادانىڭ مۇداپىئە سېتىۋېلىش ئىشلىرىغا مەسئۇل دۆلەت كاتىپى ستېفېن فۇھر بىلەن بىرلىكتە ئېلان قىلدى.

ئاۋسترالىيە باش مىنىستىرى ئانتونىي ئالبانىسنىڭ ئىشخانىسى ئېلان قىلغان باياناتقا ئاساسلانغاندا، بۇ ئاۋسترالىيەنىڭ ئۇپۇق سىرتى رادار تېخنىكىسىنى تۇنجى قېتىم چەت ئەلگە سېتىشى بولۇپ، مەزكۇر تېخنىكا كانادانىڭ شىمالىي قۇتۇپ رايونىنى كۆزىتىشىگە ياردەم بېرىدۇ.

ئالبانىس باياناتىدا: «ئاۋسترالىيەنىڭ مۇداپىئە سودىسىدىكى مۇھىم بۇرۇلۇش نۇقتىسى بولغان بۇ كېلىشىم، كانادا بىلەن تېخىمۇ چوڭقۇر ۋە ئۆزئارا مەنپەئەت يەتكۈزىدىغان مۇداپىئە سانائىتى ھەمكارلىقىمىزغا ئاساس سالىدۇ» دېدى.

ئاۋسترالىيەنىڭ «جىندالى» (Jindalee) مەشغۇلات رادار تورى ئايروپىلان، پاراخوت ۋە باشقۇرۇلىدىغان بومبىلارنى 3000 كىلومېتىر يىراقلىقتىنمۇ بايقىيالايدۇ ۋە ئىز قوغلىيالايدۇ.

فۇھر بۇ تېخنىكىنىڭ كانادانىڭ شىمالىي قۇتۇپ رايونىدىكى ۋەزىيەتنى ئىگىلەش ئىقتىدارىنى تېخىمۇ يۇقىرى كۆتۈرۈشىگە پۇرسەت يارىتىپ بېرىدىغانلىقىنى ئېيتتى.

مۇخبىرلار فۇھردىن كانادانىڭ بۇ تېخنىكىنى سېتىۋېلىش سەۋەبىنىڭ، ئامېرىكانىڭ كانادادىن بۇ جەھەتتە تېخىمۇ كۆپ تىرىشچانلىق كۆرسىتىشنى تەلەپ قىلغانلىقى بىلەن مۇناسىۋىتى بار-يوقلۇقىنى سورىغاندا، ئۇ دۆلىتىنىڭ ۋاشىنگتوندىن «يۇقىرى ھەرىكەتچانلىققا ئىگە زەمبىرەك راكېتا سىستېمىسى» (HIMARS) مۇ سېتىۋالغانلىقىنى تىلغا ئالدى.

فۇھر سۆزىگە ئىلاۋە قىلىپ: «ئامېرىكا بىلەن بولغان مۇناسىۋىتىمىز ئالاھىدە، ئەمما دۇنيانىڭ باشقا جايلىرىدىمۇ قالتىس شېرىكلىرىمىز بار. بۇ رادار كېلىشىمى دەل شۇنىڭ ئىنتايىن ياخشى مىسالىدۇر» دېدى.

مۇداپىئە مىنىستىرى مارلېس ئاخبارات ئېلان قىلىش يىغىنىدا: «بۇ، بۈگۈنگە قەدەر ئېلىپ بارغان ئەڭ كەڭ كۆلەملىك مۇداپىئە ئېكسپورتىمىز بولۇپ ھېسابلىنىدۇ. ئاۋسترالىيە بىلەن كانادا ھەمىشە ئىنتايىن يېقىن دوستلاردىن بولۇپ كەلدى، بىراق بۈگۈن بىز ئىمزالىغان بۇ كېلىشىم ئارقىلىق مۇناسىۋىتىمىزگە ئىنتايىن مۇھىم بىر ئىستراتېگىيەلىك ئۆلچەم قوشۇلدى» دېدى.

مارلېس ئاۋسترالىيەنىڭ بۇ رادار سىستېمىسىنىڭ كانادانىڭ ئۇزۇن مۇساپىلىك شىمالىي قۇتۇپ كۆزىتىش سىستېمىسىنىڭ «ئومۇرتقىسى» غا ئايلىنىدىغانلىقىنى ۋە ئۇنىڭ دۇنيادىكى ئەڭ ئىلغار رادار ئىكەنلىكىنى بىلدۈردى.

دۇنياۋى مۇداپىئە ۋە ئاۋىياتسىيە ساھەسىدە پائالىيەت كۆرسىتىۋاتقان «BAE Systems Australia» شىركىتى بۇ سىستېمىنى تاپشۇرۇپ بېرىش خىزمىتىنى بۇ يىل 1-ئىيۇلدىن باشلاشنى پىلانلىماقتا.