دۈشەنبە كۈنى كەچتە ياپونىيەنى زىلزىلىگە سالغان 7.4 باللىق يەر تەۋرەشتىن كېيىن، دۆلەتنىڭ شىمالىي ۋە شەرقىي شىمالىي قىسىملىرىدا دېڭىز تاشقىنى دولقۇنلىرى كۆرۈلدى.

ئامېرىكا گېئولوگىيەلىك تەتقىقات ئىدارىسىنىڭ بىلدۈرۈشىچە، خەلقئارا ئۆلچەملىك ۋاقىت يەنى گىرىنۋىچ ۋاقتى سائەت 07:52 دە ئىۋاتې ئۆلكىسىدىكى مىياكو شەھىرىنىڭ تەخمىنەن 114 كىلومېتىر ئوچۇق دېڭىز تەۋەلىكىدە 7.4 بال يەر تەۋرىگەن.

ياپونىيە ھۆكۈمىتى يەر تەۋرەشنىڭ دەرىجىسىنى 7.5 بال دەپ بېكىتكەن ۋە تىنچ ئوكيان قىرغىقىدىكى خوككايدو، ئائومورى ۋە ئىۋاتې رايونلىرىدا دېڭىز تاشقىنى ئاگاھلاندۇرۇشى چىقارغان.

ھۆكۈمەت تەرىپىدىن ئېلان قىلغان ئۇقتۇرۇشتا: «دېڭىز قىرغىقى ياكى دەريا بويلىرىدىكى كىشىلەر دەرھال ئېگىز جاي ۋە تېخىمۇ بىخەتەر رايونلارغا تارقاقلاشتۇرۇلۇشى كېرەك» دېيىلگەن.

كيودو خەۋەرلىرى (Kyodo News) تور بېتىنىڭ خەۋىرىگە قارىغاندا، تىنچ ئوكياندىكى ئىۋاتې ۋە ئائومورى ئۆلكىلىرىنىڭ ئوچۇق دېڭىز تەۋەلىكىدە دېڭىز تاشقىنى دولقۇنلىرى كۆرۈلگەن.

دېڭىز تاشقىنى ئېگىزلىكىنىڭ ئۈچ مېتىرغا يېتىشى مۇمكىنلىكى توغرىسىدا ئاگاھلاندۇرۇش بەرگەن دائىرىلەر، ئائومورى ۋە مىياگى ئۆلكىلىرىدىكى يادرو ئېلېكتىر ئىستانسىلىرىدا «ھېچقانداق نورمالسىزلىقنىڭ كۆرۈلمىگەنلىكى» نى بىلدۈرگەن.

يەر تەۋرەشتىن كېيىن پايتەخت توكيو بىلەن ئائومورى ئۆلكىسى ئوتتۇرىسىدىكى تېز پويىز قاتنىشى توختىتىلغان.

ياپونىيە باش ۋەزىرى سانائې تاكايىچى يەر تەۋرەش يۈز بەرگەن رايونلاردىكى پۇقرالارنى يۈز بېرىش ئېھتىمالى بولغان دېڭىز تاشقىنىدىن ساقلىنىش ئۈچۈن «ئېگىز جايلارغا كېتىش» كە چاقىرغان.

يەر تەۋرەش سەۋەبىدىن تالاپەت كۆرۈلۈپ كۆرۈلمىگەنلىكى ھەققىدە ھازىرغىچە ھېچقانداق مەلۇمات بېرىلمىگەن.