رۇسىيە كىرېمىل سارىيى باياناتچىسى دمىترىي پېسكوۋ ئەنگلىيەنىڭ ئۇكرائىنا كىرىزىسىنىڭ تىنچلىق مۇساپىسىنى توسۇش ئۈچۈن سىستېمىلىق قەدەملەرنى بېسىۋاتقانلىقىنى ئەسكەرتىپ: «ئەنگلىيە ئۇرۇشتا كىيېۋ ھاكىمىيىتى تەرەپتە تۇرۇۋاتىدۇ» دېدى.
باياناتچى پېسكوۋ پايتەخت موسكۋادا مۇخبىرلارنى كۈتۈۋېلىش يىغىنىدا كۈنتەرتىپتىكى مەسىلىلەر توغرىسىدا بەرگەن باياناتىدا مۇنداق دېدى:
«ئەنگلىيەنىڭ ئۇزۇن مۇساپىلىك <Skale> ناملىق باشقۇرۇلىدىغان بومبىلىرىنىڭ ئەنگلىيەدە ئىشلەنگەن زاپچاسلىرىغا ئالاقىدار ئۇچۇرلارنىڭ مەخپىيەتلىكىنى بىكار قىلىش پىلانى ئىنتايىن سەلبىيدۇر. دەرۋەقە، ئەنگلىيە ئۇرۇشتا كىيېۋ ھاكىمىيىتى تەرەپتە تۇرۇۋاتىدۇ. ئەنگلىيە تىنچلىق مۇساپىسىنى توسۇش ئۈچۈن سىستېمىلىق قەدەملەرنى باسماقتا.»
پېسكوۋ رۇسىيە ئارمىيەسىنىڭ مەزكۇر باشقۇرۇلىدىغان بومبا ئىشلەپچىقىرىش ئورۇنلىرىنى ئېنىقلاپ چىقىش ۋە يوقىتىش يۆنىلىشىدىكى خىزمەتلىرى توغرىسىدا توختالدى.
ئۇ يەنە ئۇكرائىنانىڭ رۇسىيەدىكى ئېلېكترونلۇق سودا سۇپىلىرىدىن «Ozon» ۋە «Wildberries» گە تەۋە ئامبار ۋە ئەشيا ئوبوروت مۇئەسسەسەلىرىگە قىلغان ھۇجۇملىرى توغرىسىدا توختىلىپ مۇنداق دېدى:
«ئۇكرائىنا ھەر خىل مەقسەتلەر بىلەن سودا ئۇل ئەسلىھەلىرىنى نىشان قىلىشقا ئۇرۇنماقتا. بىراق كىيېۋ ھاكىمىيىتى بۇ جەھەتتە مۇۋەپپەقىيەت قازىنالمايدۇ. كىيېۋ ھاكىمىيىتى فىرونتتىكى ۋەزىيەتكە تەسىر كۆرسىتەلمەيدۇ. ئۇكرائىنا ھۇجۇملىرىغا قايتۇرۇلغان جاۋابقا ھەر كۈنى شاھىت بولۇۋاتىدۇ ۋە بۇندىن كېيىنمۇ شاھىت بولىدۇ.»
