كرېمىل ئامېرىكالىق مۇزاكىرىچىلەر ستىۋ ۋىتكوفت بىلەن جارېد كۇشنېرنىڭ موسكۋا ۋە كىيېۋ زىيارەتلىرىدىن كېيىن، رۇسىيەنىڭ ئۇكرائىنا ئۇرۇشىغا مۇناسىۋەتلىك ۋاشىنگتون ۋە كىيېۋ بىلەن يېڭىدىن ئۈچ تەرەپلىك سۆھبەت ئۆتكۈزۈش ئېھتىمالىنى چەتكە قاقمايدىغانلىقىنى بىلدۈردى.

ۋاشىنگتون دىققىتىنى ئىران بىلەن بولۇۋاتقان ئۇرۇشقا يۆتكىگەنلىكتىن، ئىككىنچى دۇنيا ئۇرۇشىدىن بۇيان ياۋروپادا يۈز بەرگەن ئەڭ قانلىق توقۇنۇشنى ئاخىرلاشتۇرۇشقا قارىتىلغان ئامېرىكا باشچىلىقىدىكى دىپلوماتىك تىرىشچانلىقلار يېقىنقى ئايلاردا توختاپ قالغانىدى.

رۇسىيە ۋە ئۇكرائىنا مۇزاكىرىچىلىرى ئاخىرقى قېتىم 2-ئايدا جەنۋەدە ئۆتكۈزۈلگەن، ئامېرىكا مۇرەسسەچىلىك قىلغان سۆھبەتتە بىر يەرگە جەم بولغان. ئەمما تەرەپلەر مۇرەككەپ زېمىن مەسىلىسىدە كېلىشىم ھاسىل قىلالمىغان. شۇنىڭدىن بۇيان سۆھبەت قايتا باشلانمىدى.

كرېمىل باياناتچىسى دىمىترىي پېسكوۋ مۇخبىرلارغا بەرگەن باياناتىدا، رۇسىيەنىڭ «ئۈچ تەرەپلىك سۆھبەت شەكلىنى قايتا باشلاش ئېھتىمالىنى چەتكە قاقمايدىغانلىقىنى، ئەمما ھازىرقى باسقۇچتا سۆھبەتنىڭ ئورنى ياكى ئېنىق ۋاقتى ھەققىدە بىر نەرسە دېيىشكە تېخى بالدۇر ئىكەنلىكىنى» بىلدۈردى.

ۋىتكوفت بىلەن كۇشنېر توقۇنۇشنى ئاخىرلاشتۇرۇشقا قارىتىلغان يېڭى دىپلوماتىك ھەرىكەت دائىرىسىدە، ھەپتە ئاخىرى رۇسىيە پىرېزىدېنتى ۋىلادىمىر پۇتىن ۋە ئۇكرائىنا پىرېزىدېنتى ۋولودىمىر زېلېنسكىي بىلەن كۆرۈشتى.

ئۇكرائىنا پىرېزىدېنتلىق مەھكىمىسىدىكى يۇقىرى دەرىجىلىك بىر مەنبە فرانسىيە ئاخبارات ئاگېنتلىقىغا (AFP) بەرگەن باياناتىدا، بۇ ئىككى ئەمەلدارنىڭ ئۇرۇشنى ئاخىرلاشتۇرۇش ئۈچۈن «تېخىمۇ ئۈنۈملۈك» تەكلىپلەرنى ئېلىپ كەلگەنلىكىنى ئېيتتى. ئەمما موسكۋا ياكى كىيېۋنىڭ ھېچقايسىسى سۆھبەتتە بۆسۈش ھاسىل قىلىنغانلىقىنى ئېلان قىلمىدى.

تۆت يېرىم يىلدىن بۇيان داۋاملىشىۋاتقان توقۇنۇشتا ئون مىڭلىغان ئەسكەر ۋە پۇقرا ھاياتىدىن ئايرىلدى.

مۇزاكىرە مۇساپىسى ئۇكرائىنانىڭ شەرقىدىكى دونباس رايونى مەسىلىسى سەۋەبىدىن توختاپ قالماقتا. رۇسىيە بۇ رايوننى تولۇق كونترول قىلالمىغان بولسىمۇ، ئۇنى ھەر قانداق تىنچلىق كېلىشىمىنىڭ بىر قىسمى سۈپىتىدە تەلەپ قىلماقتا.