ترامپ جۈمە كۈنى خىتاي ماللىرىغا %100 لىك يېڭى تاموژنا بېجى قويۇش ۋە «ھالقىلىق يۇمشاق دېتاللار» نىڭ ئېكسپورتىنى چەكلەش توغرىسىدا ۋەدە بەرگەندىن كېيىن، خىتاي بۇ ھەقتە بايانات ئېلان قىلدى.
خىتاي ئامېرىكا پىرېزىدېنتى دونالد ترامپنىڭ خىتاي ماللىرىغا يۈكلىگەن ئەڭ يېڭى تاموژنا بېجىنى ئىككى يۈزلىمىچىلىك دەپ ئاتىدى ۋە ئاز ئۇچرايدىغان تۇپراق ئېلېمېنتلىرىنى ئېكسپورت قىلىش چەكلىمىسىنى ئاقلىدى، ئەمما ئامېرىكا مەھسۇلاتلىرىغا يېڭى باج يۈكلەشتىن ئۆزىنى قاچۇردى.
خىتاي سودا مىنىستىرلىقى يەكشەنبە كۈنى ئېلان قىلغان باياناتىدا، ترامپنىڭ جۈمە كۈنى «ھەيران قالارلىق» ۋە «ئىنتايىن دۈشمەنلەرچە» دەپ تەرىپلىگەن ئاز ئۇچرايدىغان تۇپراق ئېلېمېنتلىرىغا قويۇلغان ئېكسپورت كونتروللۇقىنىڭ ئۆتكەن ئايدا مادرىدتا ئۆتكۈزۈلگەن ئىككى تەرەپلىك سودا سۆھبىتىدىن بۇيان ئامېرىكا قوللانغان بىر قاتار تەدبىرلەردىن كېيىن يولغا قويۇلغانلىقىنى بىلدۈردى.
بېيجىڭ ئامېرىكانىڭ خىتاي شىركەتلىرىنى قارا تىزىملىككە كىرگۈزۈشى ۋە خىتاي پاراخوتلىرىغا پورت ھەققى يۈكلىشىنى مىسال قىلىپ كۆرسەتتى.
مىنىستىرلىق: «بۇ ھەرىكەتلەر خىتاينىڭ مەنپەئەتىگە ئېغىر زىيان سالدى ۋە ئىككى تەرەپلىك ئىقتىسادىي-سودا سۆھبىتىنىڭ كەيپىياتىنى بۇزدى. خىتاي بۇ ھەرىكەتلەرگە قەتئىي قارشى تۇرىدۇ» دېدى.
بېيجىڭ ئامېرىكانىڭ يۇقىرىقى ھەرىكەتلىرىنى ھالقىلىق مىنېراللارنىڭ ئېكسپورتىغا قويغان چەكلىمىلەر بىلەن ئوچۇق-ئاشكارا باغلىمىدى ۋە بۇ چەكلىمىلەرنىڭ «كۆپ يۈز بېرىۋاتقان ھەربىي توقۇنۇشلار» دەۋرىدە مەزكۇر مېتاللارنىڭ ھەربىي ساھەدە ئىشلىتىلىشىگە دائىر ئەندىشىلەردىن كېلىپ چىققانلىقىنى بىلدۈردى.
