جەنۇبىي كورېيە، ياپونىيەنىڭ ياپونىيە دېڭىزىدىكى تالاش-تارتىشلىق «دوكدو/تاكېشىما ئاراللىرى» ئۈستىدىكى ئىگىلىك ھوقۇقى تەلىپىنى قايتىدىن كۈنتەرتىپكە ئېلىپ كەلگەنلىكىگە نارازىلىق بىلدۈردى.

«يۆنخاپ» ئاگېنتلىقىنىڭ خەۋىرىگە قارىغاندا، جەنۇبىي كورېيە تاشقى ئىشلار مىنىستىرلىقىدىن ئېلان قىلىنغان يازما باياناتتا، «ھۆكۈمەت ياپونىيەنىڭ دوكدوغا قارىتا ئادالەتسىز ئىگىلىك ھوقۇقى تەلىپىنى تەكرارلىشىغا كۈچلۈك قارشى تۇرىدۇ» دېيىلگەن.

باياناتتا، مەزكۇر ئاراللارنىڭ تارىخ، جۇغراپىيە ۋە خەلقئارا قانۇن نۇقتىسىدىن جەنۇبىي كورېيەگە تەۋە ئىكەنلىكى تەكىتلىنىپ، ياپونىيەگە بۇ تەلەپلىرىدىن دەرھال ۋاز كېچىش چاقىرىقى قىلىنغان.

ئۇنىڭدىن باشقا، باياناتتا ياپونىيەنىڭ دوكدوغا مۇناسىۋەتلىك «ھەر قانداق ئىغۋاگەرچىلىكىگە» قاتتىق جاۋاب قايتۇرۇلىدىغانلىقى ھەققىدە ئاگاھلاندۇرۇش بېرىلگەن.

يەنە بىر تەرەپتىن، جەنۇبىي كورېيە ھۆكۈمىتىنىڭ سېئۇلدىكى ياپونىيە ئەلچىخانىسىدىن بىر ئەمەلدارنى چاقىرتىپ رەسمىي نارازىلىقىنى يەتكۈزۈشى كۈتۈلمەكتە.

ياپونىيە، «تاكېشىما» دەپ ئاتايدىغان ئاراللارنى دۆلەت مۇداپىئە ئاق تاشلىق كىتابىغا كىرگۈزۈپ، ئاراللارنىڭ ياپونىيە زېمىنى ئىكەنلىكىنى ئىلگىرى سۈرگەن ئىدى.

تالاش-تارتىشلىق ئاراللار

جەنۇبىي كورېيە «دوكدو»، ياپونلار «تاكېشىما» دەپ ئاتايدىغان رايون، ئۇزۇندىن بۇيان ئىككى دۆلەت ئوتتۇرىسىدا ئىگىلىك ھوقۇقى تالاش-تارتىشىغا سەۋەب بولۇپ كەلمەكتە.

جەنۇبىي كورېيە، كونتروللۇقى ئاستىدا تۇتۇپ تۇرۇۋاتقان، ئومۇمىي يەر كۆلىمى 0.2 كۋادرات كىلومېتىر كېلىدىغان بۇ زېمىنغا 1954-يىلىدىن بۇيان بىخەتەرلىك خادىملىرىنى ئورۇنلاشتۇرغان ئىدى.