ترامپ ھۆكۈمىتىنىڭ تۈركىيەگە 750 مىليون دوللار قىممىتىدىكى «F110» رېئاكتىپ موتورى سېتىشنى ئەمەلگە ئاشۇرۇش ئۈچۈن ھەرىكەتكە ئۆتكەنلىكى بىلدۈرۈلدى.

ئاخبارات ۋاسىتىلىرىدىكى خەۋەرلەرگە قارىغاندا، ھۆكۈمەت «General Electric» شىركىتى تەرىپىدىن ئىشلەپچىقىرىلىدىغان ۋە تۈركىيەنىڭ تۇنجى دۆلەت ئىچىدە ياسالغان ئۇرۇش ئايروپىلانى قاغان (KAAN) نى ئېنېرگىيە بىلەن تەمىنلەيدىغان موتورلارنى سېتىشنى داۋاملاشتۇرۇش نىيىتىنى دۆلەت مەجلىسىگە بىلدۈرگەن. ھۆكۈمەت جۇمھۇر رەئىس رەجەپ تاييىپ ئەردوغاننى «رايونلۇق مۇھىم بىر شېرىك» دەپ تەرىپلىگەن.

بۇ، ئامېرىكا پىرېزىدېنتى دۆنالد ترامپنىڭ كېلەر ئايدا ئەنقەرەدە جۇمھۇر رەئىس ئەردوغان بىلەن كۆرۈشۈشى كۈتۈلۈۋاتقان ناتو باشلىقلار يىغىنى ھارپىسىدا، تۈركىيەگە نىسبەتەن تاشلانغان مۇھىم بىر قەدەم دەپ قارالماقتا.

سېتىش مۇساپىسىنىڭ يېقىنقى كۈنلەردە نەتىجىلىنىشى ۋە ئارقىدىن ئامېرىكا تاشقى ئىشلار مىنىستىرلىقىنىڭ دۆلەت مەجلىسىگە رەسمىي ئۇقتۇرۇش قىلىشى كۈتۈلمەكتە.

ترامپ چارشەنبە كۈنى ئەنقەرەنىڭ «F-35» تىپلىق ئۇرۇش ئايروپىلانلىرى ۋە رېئاكتىپ موتورلىرىغا بولغان تەلىپى ھەققىدىكى سوئالغا جاۋاب بېرىپ، تۈركىيەنى «ناھايىتى خۇشال قىلىدىغان» بىر قەدەمنى تاشلىشىنىڭ مۇمكىنلىكىنى ئېيتقان ئىدى.

ترامپنىڭ 7-8-ئىيۇل كۈنلىرى ئۆتكۈزۈلىدىغان ناتو باشلىقلار يىغىنى ئۈچۈن ئەنقەرەگە كېلىشى ۋە جۇمھۇر رەئىس ئەردوغان بىلەن كۆرۈشۈشى كۈتۈلمەكتە.

ئامېرىكا تۈركىيەنىڭ رۇسىيەدىن «س - 400» ھاۋا مۇداپىئە سىستېمىسى سېتىۋېلىشىغا ئېتىراز بىلدۈرۈپ، 2019-يىلى ئەنقەرەنى «F-35» ئۇرۇش ئايروپىلانى پىروگراممىسىدىن چىقىرىۋەتكەن ئىدى. ۋاشىنگتون «س - 400» سىستېمىسىنىڭ «F-35» لەرنىڭ بىخەتەرلىكىگە تەھدىت ئېلىپ كېلىدىغانلىقىنى ۋە ناتو سىستېمىسى بىلەن ماسلاشمايدىغانلىقىنى ئىلگىرى سۈرگەن ئىدى.

تۈركىيە بولسا ئىككى سىستېما ئوتتۇرىسىدا ھېچقانداق زىددىيەت يوقلۇقىنى كۆپ قېتىم ئەسكەرتىپ، مەسىلىنى تەكشۈرۈش ئۈچۈن ئورتاق بىر كومىتېت قۇرۇشنى تەكلىپ قىلغان ئىدى.

ئەنقەرە يەنە «F-35» پىروگراممىسىدىكى مەجبۇرىيەتلىرىنى ئادا قىلغانلىقىنى ۋە پىروگراممىدىن چىقىرىۋېتىلىشىنىڭ قائىدىگە خىلاپ ئىكەنلىكىنى بىلدۈرگەن ئىدى.

تۈركىيە «F-35» ئۇرۇش ئايروپىلانلىرىنىڭ پەقەت ئۆز مۇداپىئەسىنىلا ئەمەس، بەلكى ناتونىڭ مۇداپىئە ئىقتىدارىنىمۇ كۈچەيتىدىغانلىقىنى تەكىتلىمەكتە.