ئامېرىكا پىرېزىدېنتى دونالد ترامپ تۈركىيەنىڭ پايتەختى ئەنقەرەدە ئۆتكۈزۈلگەن ناتو باشلىقلار يىغىنىنى تىلغا ئېلىپ، ناتونىڭ بۈگۈن مۇھىم بىر مۇساپىنى بېسىپ ئۆتكەنلىكىنى ۋە بىر قىسىم يول قويۇشلارنىڭ بولغانلىقىنى قەيت قىلدى.
پىرېزىدېنت ئايروپىلانىدا مۇخبىرلارغا بايانات بەرگەن ترامپ ئىنتايىن ياخشى بىر ناتو باشلىقلار يىغىنىنى باشتىن كەچۈرگەنلىكىنى ئېيتتى.
ئۇ: «يەنى بىز ئىنتايىن ياخشى بىر-ئىككى كۈننى ئۆتكۈزدۇق، نۇرغۇن مەسىلىلەر بىر تەرەپ قىلىندى. ئەمەلىيەتتە ناتو ھەقىقەتەن كىشىدە چوڭقۇر تەسىر قالدۇرىدىكەن. بۇ جەھەتتە ئىنتايىن ئىجابىي تەرەپلەر كۆپ بولدى» دېدى.
ئىككى تەرەپلىك كېلىشىملەر
دونالد ترامپ ئەنقەرەدىكى يىغىننىڭ نۇرغۇن مەسىلىلەرنى ھەل قىلغانلىقىنى بىلدۈرۈپ: «ئىنتايىن قالتىس بىر يىغىن بولدى، كىشىلەر ئامېرىكاغا ئىنتايىن ناھەق مۇئامىلە قىلىنغانلىقىنى چۈشىنىپ يەتتى» دېدى.
ئۇ بەزى سۈركىلىشلەرگە قارىماي مۇنداق دېدى: «ئىسپانىيە بۈگۈن تولۇق مەنىسى بىلەن ئارقىغا چېكىندى ھەمدە ئىنتايىن سېخىيلىق قىلدى. بىلىسىلەركى، مەن ئۇلارغا سودىنى توختىتىدىغانلىقىمنى ئېيتقان ئىدىم. ئاخىرىدا ئۇلار مېنىڭ نۇرغۇن پۇل تۆلەش تەلىپىمنى قوبۇل قىلدى.»
ئامېرىكا پىرېزىدېنتى: «مېنىڭچە ئۇلار بۇرۇن ئىنتايىن ناچار ئىدى ۋە قەبىھ مۇئامىلە قىلغان ئىدى. ئەمما بۈگۈن ئۇ يىغىن زالىدا چوڭ بىر بىرلىك نامايان بولدى» دېگەنلەرنى سۆزلىرىگە ئىلاۋە قىلدى.
ترامپ يەنە ئامېرىكانىڭ تۈركىيە بىلەن نۇرغۇن ياخشى سودا كېلىشىملىرىنى تۈزگەنلىكىنى بىلدۈرۈپ: «تۈركلەر ئىنتايىن ياخشى بىر شېرىك بولدى» دېدى.
