تۈركىيە دۆلەت مۇداپىئە مىنىستىرلىقى دىپلوماتىيە يولىنى چاقىرىق قىلدى ھەمدە بىرلەشكەن دۆلەتلەر تەشكىلاتىنى ئىران ئۇرۇشىنىڭ ئوتتۇرا شەرقتە تېخىمۇ يامراپ كېتىشىنىڭ ئالدىنى ئېلىش ئۈچۈن ھەرىكەتكە ئۆتۈشكە دەۋەت قىلدى.

تۈركىيە ئامېرىكا بىلەن ئىسرائىلىيەنىڭ ئىرانغا قاراتقان ھۇجۇملىرىنىڭ داۋاملىشىشى بىلەن، ئوتتۇرا شەرقتە كۈچىيىۋاتقان زوراۋانلىقنىڭ پۈتكۈل رايونغا يامراپ كېتىشى مۇمكىنلىكىنى ئاگاھلاندۇردى ۋە دىپلوماتىيەگە قايتىدىن ئەھمىيەت بېرىشكە چاقىردى.

تۈركىيە دۆلەت مۇداپىئە مىنىستىرلىقىنىڭ باياناتچىسى، ئادمىرال زەكى ئاكتۈرك پەيشەنبە (2026-يىلى 2-ئاپرېل) مۇنداق دېدى: «ئىسرائىلىيە بلەن ئامېرىكانىڭ ئىرانغا قىلغان ھۇجۇمى بىلەن باشلانغان، ئىراننىڭ ئىسرائىلىيەدىن ئۆچ ئېلىشى ۋە پارس قولتۇقىدىكى ئامېرىكا ھەربىي بازىلىرىغا باشقۇرۇلىدىغان بومبا ۋە ئۇچقۇلار بىلەن ھۇجۇم قىلىشى نەتىجىسىدە كۈچەيگەن بۇ ئۇرۇش، تېخىمۇ چوڭ رايون خاراكتېرلىك توقۇنۇشقا ئايلىنىپ كېتىش جەھەتتە يەنىلا ئېغىر تەھدىت پەيدا قىلماقتا.»

ئۇ سۆزىنى داۋاملاشتۇرۇپ: «بارلىق تالاش-تارتىشلار خەلقئارا قانۇن ئاساسىدا، سۆھبەت ۋە دىپلوماتىيە ئارقىلىق ھەل قىلىنىشى كېرەك بىزنىڭ بۇ يۆنىلىشتىكى قەتئىي مەيدانىمىز ۋە تىرىشچانلىقىمىز داۋاملىشىۋاتىدۇ. رايونىمىزنىڭ تىنچلىقى ۋە مۇقىملىقىغا زىيان يەتكۈزىدىغان توقۇنۇشلارنىڭ بالدۇرراق ئاخىرلىشىشىنى ئۈمىد قىلىمىز.»

مۇناسىۋەتلىك ئۇچۇرلارTRT World - Türkiye's Fidan discusses regional issues with Jordanian, Japanese, Qatari, Egyptian counterparts

ئاكتۈرك يەنە ئىسرائىلىيەنىڭ لىۋان، سۈرىيە ۋە پەلەستىن قاتارلىق سەپلەردە داۋاملىشىۋاتقان ھەربىي ھۇجۇملىرىنى ئەيىبلىدى.

ئۇ ئىسرائىلىيەنىڭ لىۋاندىكى ھۇجۇملىرىنىڭ خەلقئارا قانۇن ۋە ئىنسانپەرۋەرلىك قانۇنلىرىغا خىلاپلىق قىلغانلىقىنى تەكىتلەپ: «بۇ ھۇجۇملار ب د ت نىڭ ئۈچ نەپەر تىنچلىق ساقلاش خادىمىنىڭ ئۆلۈشىگە سەۋەب بولدى» دېدى.

ئاكتۈرك يەنە ئىسرائىلىيەنىڭ سۈرىيەنىڭ جەنۇبىغا ھۇجۇم قىلىپ، سۈرىيەنىڭ «ئىگىلىك ھوقۇقى ۋە تېررىتورىيە پۈتۈنلۈكى» گە داۋاملىق دەخلى-تەرۇز قىلىۋاتقانلىقىنى، شۇنىڭ بىلەن بىرگە ئىشغالىيەت ئاستىدىكى غەربىي قىرغاقتا «قانۇنسىز ئولتۇراقلىشىش پائالىيەتلىرىنى داۋاملاشتۇرۇپ»، غەززەگە ھۇجۇم قىلىۋاتقانلىقىنى قوشۇمچە قىلدى.

ئۇ خەلقئارا جەمئىيەتنى ھەرىكەتكە ئۆتۈشكە چاقىردى.

ئاكتۈرك: «خەلقئارا تۈزۈمنىڭ قانۇنلۇق ئورنىغا ۋە خەلقئارا قانۇنغا بولغان ئىشەنچكە تېخىمۇ كۆپ زىيان يېتىشنىڭ ئالدىنى ئېلىش ئۈچۈن، بىز پۈتكۈل خەلقئارا جەمئىيەتنى، بولۇپمۇ ب د ت نى ئىسرائىلىيەنىڭ تاجاۋۇزچىلىقىنى توسۇشتا مەسئۇلىيەتنى ئۈستىگە ئېلىشقا يەنە بىر قېتىم چاقىرىمىز» دېدى.

بۇنىڭدىن باشقا، ئاكتۈرك تۈركىيە باش ئىشتاب باشلىقى گېنېرال سەلچۇق بايراقتارئوغلۇنىڭ پەيشەنبە كۈنى چۈشتىن كېيىن لىۋىيە قۇرۇقلۇق ئارمىيە قوماندانىنى قوبۇل قىلىدىغانلىقىنى بىلدۈردى.

مۇناسىۋەتلىك ئۇچۇرلارTRT World - Israel 'primarily' responsible for 'unlawful war' with Iran: Türkiye's Erdogan